Nga komisioni i pranimit te Apeli: si u bllokua punësimi i tre inspektorëve në Gjakovë

Një rajon i tërë, ai i Gjakovës, mbulohet nga vetëm një inspektor pune. Njëkohësisht, tre kandidatë të shpallur fitues të konkursit për inspektorë për siguri dhe shëndet në punë pikërisht për atë rajon nuk kanë hyrë kurrë në detyrë. Konkursi u anulua dhe çështja përfundoi në gjykatë.

Zana Babuni, Çlirim Avdullahu dhe kandidati i identifikuar me inicialet A. B. fituan konkursin e shpallur nga Ministria e Financave, por pozitat mbetën në letër. Anulimi erdhi pas vendimit të Këshillit të Pavarur Mbikëqyrës për Shërbimin Civil të Kosovës, i cili aprovoi ankesën e një kundërkandidati.

Të tre iu drejtuan Gjykatës Themelore të Prishtinës, Departamentit për Çështje Administrative, përmes avokatit Egzon Doli, duke paditur Këshillin dhe Ministrinë e Financave. Gjykata ua aprovoi padinë dhe anuloi vendimin e Këshillit. Po ashtu, ajo detyroi ish-Ministrinë e Financave, kompetencat e së cilës për këtë çështje i ka marrë Ministria për Punë, Familje dhe Vlerat e Luftës Çlirimtare, të nxjerrë një vendim të ri dhe të procedojë me angazhimin e menjëhershëm në punë të paditësve. Sipas vendimit gjyqësor, ministria nuk kishte dhënë fare përgjigje në padi, ndërsa Këshilli i kishte propozuar gjykatës ta refuzonte padinë si të pabazuar dhe ta linte në fuqi anulimin e konkursit.

Vendimi nuk e mbylli çështjen. Këshilli ushtroi ankesë dhe rasti ndodhet në Gjykatën e Apelit.

Ndërkohë, Inspektorati Qendror i Punës hapi një konkurs të ri, duke pohuar se në rajonin e Gjakovës ka vetëm një inspektor pune. Zëdhënësja e Inspektoratit të Punës, Kaltrina Cakolli, thotë se konkursi i ri nuk përbën pengesë për zbatimin e vendimit të Gjykatës Administrative.

Në thelb të anulimit qëndron një emër: Rizah Plakolli, ish-ushtrues detyre i drejtorit të Inspektoratit Qendror të Punës. Arsyeja kryesore e anulimit po del të jetë përfshirja e tij në procedurat e konkursit në atë cilësi. Këshilli kujton se vendimi i ministrit në detyrë të Financave, Hekuran Murati, për ta caktuar Plakollin ushtrues detyre ishte kontestuar edhe më herët përmes një ankese tjetër, të cilën Këshilli e kishte aprovuar duke e shfuqizuar vendimin e ministrit dhe duke e shpallur të paligjshëm.

Sipas Këshillit, Murati e shpërfilli atë vendim dhe e caktoi sërish të njëjtin zyrtar në pozitën e ushtruesit të detyrës së drejtorit ekzekutiv të Inspektoratit. Mbi këtë bazë, Këshilli ka konstatuar se Plakolli e themeloi komisionin e pranimit për konkursin pa autorizim ligjor, pasi ndodhej kundërligjshëm në pozitën ku e kishte caktuar ministri. Konstatimin e mbështet në paragrafin 2 të nenit 35 të Ligjit për Zyrtarët Publikë nr. 08/L-197.

I kontaktuar, Plakolli ka thënë se nuk i komenton vendimet e Këshillit dhe se caktimi i tij si ushtrues detyre ka qenë vendim i ministrit, duke mos pranuar të deklarohet më tej pasi nuk është më në atë pozitë. Ministri Murati nuk u përgjigj në pyetjet e dërguara deri në publikimin e hulumtimit.