Gjakderdhje në një funeral në Jordani: dy të armatosur vrasin shtatë veta brenda kishës

Dhjetëra njerëz ishin mbledhur brenda një kishe për t'i dhënë lamtumirën e fundit një të ndjeri, kur dy persona të armatosur hynë dhe hapën zjarr mbi ta. Sipas agjencisë jordaneze të sigurisë publike, të paktën shtatë persona humbën jetën, ndërsa media shtetërore raporton edhe dhjetë të plagosur.

Sulmi ndodhi të premten në Hmood, një qytet me shumicë të krishterë në pjesën veriore të provincës së Karakut, rreth 90 milje (afro 145 kilometra) në jug të kryeqytetit Aman.

Sipas raportimeve, sulmuesit mbërritën me një makinë, nisën të qëllonin brenda kishës dhe më pas u larguan nga vendngjarja. Agjencia e sigurisë publike i ka përshkruar si persona të paidentifikuar dhe ka bërë të ditur se ata po ndiqen. Në zonë është nisur një operacion i gjerë kërkimi.

Zëdhënësi i qeverisë jordaneze, Mohammad al-Momani, shkroi në rrjetin X: "Forcat e sigurisë po ndjekin një incident me të shtëna në Guvernatoratin e Karakut". Sipas tij, forcat e sigurisë janë vendosur në terren.

Dëshmitarët e kanë përshkruar sulmin si të zgjatur. Një nga të pranishmit në ceremoni i tha televizionit shtetëror Al-Mamlaka se dy sulmuesit ishin të armatosur me një pushkë dhe një pistoletë dhe se qëlluan mbi pjesëmarrësit në funeral për disa minuta. Një tjetër dëshmitar deklaroi për të njëjtin televizion se njëri prej tyre mbante një pushkë Kallashnikov AK-47.

Asnjë grup apo individ nuk e ka marrë deri tani përgjegjësinë për sulmin, ndërsa motivi dhe identiteti i autorëve mbeten të panjohur.