Gjak në sheshin "Mehë Uka": dy të lënduar nga mjet i mprehtë, një i dyshuar pas hekurave

Një person është arrestuar pas përleshjes që tronditi mbrëmjen, në sheshin "Mehë Uka", në qendër të Mitrovicës së Jugut, ku dy persona të moshës madhore mbetën të lënduar dhe u dërguan për trajtim mjekësor.

Zëdhënësi i Policisë së Kosovës për rajonin e Mitrovicës së Jugut, Avni Zahiti, bëri të ditur se rasti u raportua rreth orës 21:44.

"Rreth orës 21:44, është raportuar për një përleshje në sheshin “Mehë Uka” në Mitrovicë, ku dy persona të moshës madhore kanë pësuar lëndime dhe janë dërguar për tretman mjekësor. Sipas informatave të para, lëndimet dyshohet se janë shkaktuar nga një mjet i mprehtë. Policia ka identifikuar dhe arrestuar një person të dyshuar. Hetuesit policorë janë duke vazhduar me veprime hetimore", tha Zahiti.

Në minutat e para pas ngjarjes, në qendër të qytetit u raportua për një rrahje në të cilën ishte përfshirë një grup personash, me dyshime se ishin përdorur armë të ftohta. Versioni zyrtar që pasoi e ngushtoi tabllonë: dy të lënduar, një i dyshuar i identifikuar dhe i vënë në pranga.

Identiteti i të lënduarve dhe i personit të arrestuar nuk është bërë publik, ashtu siç nuk dihet ende as motivi i konfliktit. I dyshuari mbetet i pafajshëm derisa të provohet e kundërta nga gjykata.