Gërxhaliu: Pa institucione, s'ka rimëkëmbje ekonomike për Kosovën

Kriza politike në Kosovë po e mban ekonominë peng, thotë ekonomisti Safet Gërxhaliu, sipas të cilit mungesa e institucioneve funksionale po prodhon pasiguri për bizneset dhe po bllokon çdo shans për rritje.

Gërxhaliu, ish-kreu i Odës Ekonomike të Kosovës, vlerësoi se vendi po përballet me pasiguri ekonomike pikërisht për shkak të bllokadës politike, dhe se mungesa e institucioneve krijon jostabilitet te bizneset.

"Në këto rrethana, të mungesës së institucioneve politike, në Kosovë është e pamundur të flitet për ekonomi. Duhet të kuptohet që për ekonomi të zhvilluar, kapitali kërkon siguri shtetërore, biznesi kërkon parashikueshmëri dhe plan-fitim, ndërsa qytetari kërkon mirëqenie dhe jetë më të dinjitetshme. Në këto rrethana, është e pamundur të mendohet që Kosova do të ketë rimëkëmbje ekonomike të mirëfilltë sepse politika po absorbon energjinë", tha Gërxhaliu.

Sipas tij, derisa vëmendja dhe energjia mbeten të përqendruara te politika, hapësira për një rimëkëmbje ekonomike të mirëfilltë ngushtohet, ndërsa investitorët presin garanci shtetërore dhe një mjedis të parashikueshëm para se të angazhohen.