Gërvalla, nën thirrjet për dorëheqje: Asnjë pikëtakim me Specialen, as me EULEX

Ministrja e Drejtësisë, Donika Gërvalla, e ka hedhur poshtë sërish akuzën se ka dorëzuar dosje në Gjykatën Speciale kundër ish-krerëve të Ushtrisë Çlirimtare të Kosovës (UÇK), në një kohë kur protestuesit kërkojnë largimin e saj nga posti.

Në një konferencë për media të shtunën, ajo mohoi çdo lidhje, të drejtpërdrejtë apo të tërthortë, me UNMIK-un, EULEX-in apo Dhomat e Specializuara të Kosovës, gjykatën që njihet në Kosovë si Specialja. Sipas saj, pretendimet për bashkëpunim janë të pavërteta dhe tema tashmë është shteruar.

"Deklaratat që më lidhin mua me bashkëpunimin, tashmë është bërë bozë sepse i kam shpjeguar disa herë. Nuk kanë asnjë hallkë, as me UNMIK, as me EULEX, as me Gjykatën Speciale, nuk ka asnjë pikëtakim timin, as direkt dhe as indirekt. Edhe pak durim duhet të kemi sepse aktgjykimi do të vijë shpejt. Ata që më së shumti kanë bërtitur në këtë lëmi e më kanë etiketuar, të paktën para pasqyrës të skuqen në një moment, por që kanë përsëritur gënjeshtrat e vëna në qarkullim nga ata vetë", tha Gërvalla.

Akuzat kanë marrë hov pas aktgjykimit dënues që Gjykata Speciale në Hagë shqiptoi ndaj katër ish-drejtuesve të UÇK-së, të cilët u dënuan gjithsej me 81 vjet burgim. Kritikët e ministres e kanë akuzuar se ka heshtur pas vendimit. Gërvalla e kundërshtoi këtë, duke thënë se qëndrimin zyrtar e mbajti kryeministri Albin Kurti në emër të Qeverisë, ndërsa ajo iu kthye punës për hapat e mëtejmë.

"Unë s'kam heshtur, jam ministre e Drejtësisë, kryeministri ka dhënë një deklaratë në emër të Qeverisë. Unë bashkë me ekipin qysh ditën e parë i jam futur punës me qëllim që të përgatitemi me një betejë. Sepse çështja e Gjykatës Speciale është betejë ligjore, jo deklaratash në media. Ne duhet të jemi profesionistë, të mençur, me kokë të ftohtë, duhet të përgatitemi për fazat e ardhshme", deklaroi ajo.

Ministrja theksoi se çështjet që lidhen me Dhomat e Specializuara kërkojnë ekspertizë të lartë dhe u bëri thirrje kritikëve të presin publikimin e aktgjykimit të plotë, sepse, sipas saj, vetëm atëherë faktet dhe zhvillimet mund të vlerësohen më qartë. Ajo pranoi gjithashtu se ka hapësirë për më shumë: "Jam e bindur se mund të bëjmë më shumë, por jemi duke analizuar të gjitha rrethanat që secili në pozicionin e tij, në përgjegjësinë e tij ta kryejë punën e tij si duhet dhe me ndershmëri".

Në tryezë është edhe projektligji i Partisë Demokratike të Kosovës (PDK) për ndryshimin e ligjit për Dhomat e Specializuara. Gërvalla bëri të ditur se ekspertët e Ministrisë së Drejtësisë po e analizojnë atë dhe se, pas përfundimit të analizës, ministria do t'ia përcjellë Qeverisë opinionin përkatës. Sipas saj, procedura nuk do të vonojë.

Për thirrjet e protestuesve që ajo të japë dorëheqje, Gërvalla nuk tha nëse do ta bëjë këtë hap. "Është e drejtë e secilit qytetar që të kërkojë dorëheqjen e secilit ministër. Më në fund jetojmë në një shtet demokratik ku është e drejtë e secilit të shprehë mendimin e tij. Nuk i komentoj kërkesat për dorëheqje, por as t'ia ndaloj fjalën askujt", u përgjigj ajo.