Gazetari Mehmetaj: U kërcënova pasi refuzova të fshija postimin për deputetin Geci

Gazetari Lirim Mehmetaj thotë se është kërcënuar pasi refuzoi të fshinte një postim kritik ndaj deputetit të Lëvizjes Vetëvendosje, Fatos Geci. Ai thotë gjithashtu se rastin e ka raportuar në polici. Në Debat Plus, Mehmetaj deklaroi se postimi nuk do të hiqet, pavarësisht një ndërmjetësimi për pajtim mes familjes Geci dhe familjes së tij.

Sipas rrëfimit të gazetarit, pas publikimit të postimit e kontaktuan familjarë të Gecit. Ata i kërkuan ta largonte postimin ose t'ia ndryshonte përmbajtjen. Mehmetaj thotë se nuk pranoi dhe se kërcënimet erdhën pikërisht pas refuzimit të tij.

"Në mëngjes kam shkuar në polici, e kam raportu rastin. Unë mangup s’jam. Po me ma diktu çka shkruaj, nuk ka shansa, me u rrotullu tokë e qiell. E kam raportuar… kur kam thënë nuk e hjeku, më kanë kërcënuar. Iu kam thënë në rregull…", tha Mehmetaj.

Gazetari tha se pret që policia të ndërmarrë masa. Nuk dihet ende nëse policia ka vepruar në lidhje me denoncimin e tij.

Përplasja nisi me një postim të Mehmetajt për deklaratat e Fatos Gecit lidhur me ish-presidentin Hashim Thaçi dhe ish-krerët e Ushtrisë Çlirimtare të Kosovës (UÇK). Në atë postim, gazetari i kritikoi këto deklarata. Ai pretendoi se deputeti ua kishte atribuar UÇK-së, Thaçit dhe të tjerëve 244 vrasje.

Ndërkohë, Gani Geci njoftoi se ishte mbajtur një takim pajtimi mes dy familjeve në një restorant në Prishtinë. Takimin e ndërmjetësuan deputeti Anton Quni dhe Fadil Hadërgjonaj. Sipas njoftimit të Gani Gecit, palët ishin zotuar të mos merreshin më me njëra-tjetrën, as përmes shkrimeve, as përmes paraqitjeve televizive.

Mehmetaj, megjithatë, nuk tërhiqet. Ai këmbëngul se postimi mbetet aty dhe se do të vazhdojë t'i shprehë publikisht qëndrimet e tij ndaj deputetit Geci. "Nuk pranoj të më diktohet se çfarë të shkruaj", tha ai.