Gaz lotsjellës nga tarraca e Kryeministrisë: policia godet turmën, protestuesit qëndrojnë

Bombolat e gazit lotsjellës nuk vinin vetëm nga rreshtat e policisë në rrugë. Kamerat dhe aparatet fotografike kapën efektivë të policisë në tarracën e godinës së Kryeministrisë teksa i hidhnin ato direkt nga lartësia mbi protestuesit e mbledhur në shesh.

Përplasja nisi kur turma masive u kthye sërish pranë selisë së qeverisë dhe iu afrua perimetrit të sigurisë. Forcat e rendit reaguan me një operacion të gjerë për shpërndarjen e saj: mjetet e policisë lëshuan ujë me presion në sasi të mëdha drejt njerëzve, ndërsa re të dendura gazi lotsjellës mbuluan të gjithë bulevardin "Dëshmorët e Kombit".

Tensionet në kryeqytet arritën kështu pikën më të lartë. Megjithë përdorimin masiv të lëndëve lotsjellëse dhe të ujit me presion, situata përballë godinës së ekzekutivit mbetet tejet kaotike, me protestuesit që refuzojnë të largohen. Ende nuk dihet nëse ka të lënduar apo të arrestuar.