Gaz lotsjellës dhe autobot para Ministrisë së Arsimit: 16 protestues të shoqëruar në Tiranë

Xhamat e Ministrisë së Arsimit në Tiranë u thyen nga pllakat e trotuarit, ndërsa policia iu përgjigj turmës me gaz lotsjellës dhe autobot me ujë. Sipas zëdhënësit të Policisë, 16 protestues janë shoqëruar pas përplasjeve që shoqëruan protestën e studentëve dhe të rinjve më 13 tetor.

Protesta nisi në orën 14:00 me thirrje kundër kryeministrit Edi Rama dhe qeverisë së tij. Për rreth një orë, studentët protestuan paqësisht, me parulla dhe slogane kundër ekzekutivit. Situata ndryshoi kur një pjesë e demonstruesve nisi të hidhte vezë dhe pllaka trotuari drejt godinës.

Protestuesit rrëzuan kangjellat që rrethonin trotuarin dhe arritën të hapnin njërën nga dyert metalike të Ministrisë. Policia ndërhyri me gaz lotsjellës dhe ujë me presion për të shpërndarë turmën.

Përplasjet zgjatën rreth tre orë. Autoboti i Policisë së Shtetit, i shoqëruar nga efektivë me mjete mbrojtëse, i shtyu protestuesit nga rruga e Durrësit drejt sheshit Skënderbej. Megjithatë, studentët nuk u larguan nga zona, ndërsa atyre iu bashkuan mijëra të tjerë që kishin marshuar nga Bulevardi "Dëshmorët e Kombit".

Kërkesa e protestuesve mbetet e njëjtë: dorëheqja e kryeministrit Rama dhe largimi i qeverisë së tij. Përballja para Ministrisë së Arsimit ndodhi në ditën e 136-të të protestave kundër qeverisë.

Nuk ka ende informacion zyrtar për të plagosur gjatë përplasjeve, as për masat që do të merren ndaj 16 protestuesve të shoqëruar.