Gati një milion euro për Istogun: kush i fitoi tenderët për tri kazermat e FSK-së

Ndërtimi i objektit të akomodimit në kazermën e Forcës së Sigurisë së Kosovës (FSK) në Istog do të kushtojë 997 mijë e 999 euro e 99 centë, pak më pak se një milion euro. Kjo është oferta më e madhe në tenderin për të cilin Ministria e Mbrojtjes ka shpallur fituesit, një projekt që përfshin tri kazerma të FSK-së: në Istog, Gjilan dhe Gjakovë.

Konkurrenca ishte e ashpër. Për Istogun u pranuan 21 oferta dhe kontrata shkoi te një grup prej katër operatorësh ekonomikë: "THEMELI COMPANY SH.P.K.; ENGINEERING RK SH.P.K.; SDA holding L.L.C.; Diacon SH.P.K.", i cili kishte ofruar çmimin më të ulët.

Edhe për kazermën e Gjilanit ministria pranoi 21 oferta. Fituese u shpall "Leoni Construction Company SH.P.K.", me një ofertë prej 697 mijë e 736 euro e 15 centë, e vlerësuar si oferta me çmimin më të ulët të përgjegjshëm.

Në Gjakovë, kontrata në vlerë prej 689 mijë e 433 euro e 23 centë iu dha kompanisë "Timora L.L.C.", gjithashtu si oferta me çmimin më të ulët.

Procedura kishte nisur ndryshe nga mënyra si u mbyll. Në njoftimin për kontratë, Ministria e Mbrojtjes kërkonte një operator ekonomik me kapacitet për të kryer ndërtimin, me projektin të ndarë në tri pjesë. Në njoftimin për dhënien e kontratës, megjithatë, u shpallën tri kompani fituese, secila për një nga kazermat.

Qëllimi i investimit përshkruhet në lëndën e kontratës: "Punët duhet të realizohen në përputhje me specifikimet teknike dhe apo paramasën dhe parallogarinë e përcaktuar në Dosjen e Tenderit, me qëllim të rritjes së operacionalitetit dhe efikasitetit në kryerjen e detyrave, në përputhje me misionin e FSK-së MM-së".

Punimet në të tri objektet parashihen të zgjasin tri vjet.