Gardianët kosovarë të akuzuar në Danimarkë dalin të lirë, por mbeten nën akuzë

Dy zyrtarët korrektues nga Kosova, të akuzuar se sulmuan një të burgosur në burgun Vestre të Kopenhagës, u liruan të mërkurën pas seancës paraprake. Gjykatësi vlerësoi se nuk ekziston rreziku që ata të arratisen, duke marrë parasysh se janë të punësuar nga Shërbimi Danez i Burgjeve dhe jetojnë në Danimarkë.

Lirimi nuk e mbyll çështjen. Të dy mbeten të akuzuar dhe e mohojnë fajësinë. Ata ishin arrestuar më 6 tetor, një ditë pas incidentit.

Sipas aktakuzës, më 5 tetor dy zyrtarët, në bashkëpunim dhe me marrëveshje paraprake ose mirëkuptim të ndërsjellë, dyshohet se e goditën të burgosurin disa herë me grushte në fytyrë dhe trup. Policia e përshkruan ngjarjen në dy momente: njëri prej tyre dyshohet se e shtyu të burgosurin në shtrat dhe e goditi në fytyrë, ndërsa tjetri më pas dyshohet se e goditi disa herë me grushte në fytyrë dhe trup.

Aktakuza shton një detaj që ka peshë: të dy ishin në detyrë dhe e kishin përfunduar tashmë periudhën gjashtëmujore të trajnimit dhe praktikës.

Pikërisht kjo e ka shtyrë Shërbimin Danez të Burgjeve të njoftojë se do ta rishikojë trajnimin e zyrtarëve korrektues nga Kosova. Drejtoresha e Shërbimit, Ina Eliasen, pranoi se rasti ka ngritur pyetje nëse përgatitja e tyre është e mjaftueshme. "Është e qartë se kur ndodh diçka e tillë, ne do të shikojmë nëse trajnimi ynë për ta është mjaftueshëm i mirë. A është praktika jonë me ta mjaftueshëm e mirë?", tha ajo.

Eliasen megjithatë nuk e vuri gjithë programin nën hije. Ajo tha se deri tani përvojat me zyrtarët korrektues nga Kosova kanë qenë të mira dhe e cilësoi rastin si incident të izoluar, shumë të ndryshëm nga çfarë është parë më parë. Sipas saj, edhe pas përfundimit të praktikës, zyrtarët nga Kosova që qëndrojnë dhe punojnë për një periudhë të caktuar në Danimarkë duhet të shoqërohen nga kolegë danezë. "Ata janë gjithmonë me zyrtarë danezë. Kur janë në trajnim, janë në trajnim me kolegë. Ata nuk punojnë vetëm", tha ajo.

Rasti vjen në një kohë kur Danimarka planifikon 300 vende për të burgosur në Kosovë. E pyetur nëse ka besim se zyrtarët që do të punojnë atje do t'i trajtojnë siç duhet të burgosurit që Danimarka do t'i dërgojë, Eliasen u përgjigj pozitivisht. Ajo tha se Danimarka synon të krijojë një sistem të posaçëm mbikëqyrjeje në burgun në Kosovë, një ide që ekzistonte më herët, por në të cilën tani është përfshirë edhe ky rast.

"Është larg, por synojmë që atje të funksionojë njësoj si në Danimarkë. Prandaj, duhet të kemi një lloj mbikëqyrjeje në korridoret atje. Për këtë po punojmë", tha Eliasen.