Gani Geci te Krimet e Rënda: arrestim apo paraqitje vullnetare? Versionet përplasen

Gani Geci ndodhet në Policinë e Kosovës, ku në orët e mbrëmjes ka nisur të intervistohet nga hetuesit e Krimeve të Rënda. Mbetet e paqartë mënyra si përfundoi atje: është arrestuar, është shoqëruar apo është paraqitur me dëshirën e tij?

Versionet nuk përputhen. Gazeta Nacionale, duke cituar burime brenda policisë, raportoi se Geci u arrestua pranë stacionit të B92 në Prishtinë. Raportime të tjera flasin për shoqërim në polici për intervistim, pa ndonjë vendim për arrestim deri tani.

I biri, Valdrin Geci, e kundërshton çdo version për arrestim. Në një deklaratë të publikuar në Facebook, ai shkruan se babai ishte me të dhe me disa miq në një lokal në Prishtinë kur mori telefonatën e policisë: "Unë, Valdrin Geci, deklaroj se kam qenë me babain dhe disa shokë duke pirë kafe në Che Bar. Pas telefonatës së policisë, Gani Geci ka shkuar vullnetarisht për të dhënë deklaratë në Policinë e Republikës së Kosovës."

Ai i quan shpifje raportimet për arrestimin dhe paralajmëron se babai do të flasë publikisht sapo të dalë nga intervista: "Pasi të intervistohet, Gani Geci do t’u përgjigjet të gjitha mediave për shpifjet e tyre se kinse është arrestuar."

Policia e Kosovës nuk ka dhënë ende sqarime zyrtare për statusin e Gecit apo për arsyet e intervistimit. Pas përfundimit të tij, pritet që prokurori të vendosë nëse Geci do të lirohet apo do të mbahet në paraburgim.

Zhvillimi vjen pasi gazetari Lirim Mehmetaj deklaroi se ishte kërcënuar nga familja Geci, pasi kishte refuzuar të fshinte ose të ndryshonte një postim kritik ndaj deputetit të Lëvizjes Vetëvendosje, Fatos Geci. "Në mëngjes kam shku në polici, e kam njoftu rastin", tha Mehmetaj. Gani Geci, nga ana e tij, kishte njoftuar më herët për një takim pajtimi mes familjarëve, të ndërmjetësuar nga deputeti Anton Quni dhe Fadil Hadërgjonaj, ndërsa Mehmetaj ka thënë se postimin nuk do ta fshijë.