Ftesa e Haxhiut për krizën politike mbetet pa përgjigje: LDK-ja i bashkohet refuzimit

Përpjekja e ushtrueses së detyrës së Presidentes, Albulena Haxhiu, për t'i ulur në një tryezë përfaqësuesit e partive politike mbi krizën politike ka mbetur pa asnjë përgjigje pozitive. Ftesa e saj për një takim nesër në orën 9 është refuzuar radhazi nga forcat kryesore politike.

PDK-ja dhe AAK-ja e hodhën poshtë ftesën menjëherë, ndërsa tani edhe LDK-ja është përgjigjur negativisht. Lajmin e konfirmoi kryetari i LDK-së, Lumir Abdixhiku, në një deklaratë për televizionin Dukagjini.

Abdixhiku e mbështeti refuzimin te statusi që partia e tij i njeh Haxhiut. Sipas tij, takimet e këtij niveli zhvillohen vetëm me kryetarët e partive dhe, në rrethanat aktuale, i vetmi bashkëbisedues i mundshëm mbetet kryetari i LVV-së, Albin Kurti.

"Ne takimet i zhvillojmë me kryetarët e partive, në këtë rast takimin e vetëm që mund ta bëjmë është me kryetarin e LVV-së, Albin Kurtin. Në pikëpamjet tona, zonja Haxhiu është deputete e Kuvendit dhe, në këtë rrjedhë, ne mund të flasim vetëm me ata që janë përgjegjës për këtë punë", tha Abdixhiku.

Me pozicionimin e LDK-së, ftesa e Haxhiut për një dialog mbi krizën politike mbetet aktualisht pa mbështetjen e partive opozitare kryesore.