Ftesa e Gjykatës për 21 të akuzuar për krime lufte: dorëzohuni para seancës

Emrat e ish-drejtuesve të lartë të policisë dhe ushtrisë serbe janë vendosur në një ftesë publike të Gjykatës Themelore në Prishtinë: 21 të akuzuar për krime lufte kundër popullsisë civile thirren të dorëzohen dhe të paraqiten para trupit gjykues.

Në dokumentin e Departamentit Special, të datës 20 korrik 2026, figurojnë ndër të tjera emrat e Obrad Stevanoviqit, Radomir Markoviqit, Krsman Jeliqit dhe Goran Radosavljeviqit, i njohur me nofkën "Guri". Çështja bazohet në aktakuzën për gjykim në mungesë të Prokurorisë Speciale, të datës 30 dhjetor 2025, e cila u vë në barrë të akuzuarve kryerjen në bashkëkryerje të krimeve të luftës kundër popullsisë civile.

Gjykata u ka bërë thirrje të dorëzohen, në mënyrë që procedura të zhvillohet në praninë e tyre, ndërsa personave që kanë informacione për vendndodhjen e të akuzuarve u kërkohet t'ia përcjellin ato Policisë së Kosovës. Ftesa lidhet me seancën fillestare të caktuar për 31 korrik 2026, në orën 10:00. Dokumenti është nënshkruar nga kryetarja e trupit gjykues, Violeta Namani-Hajra.

Të akuzuarit prezumohen të pafajshëm derisa fajësia e tyre të mos provohet me vendim të formës së prerë nga gjykata.