Fshehur mes kutive kineze: doganierët zbulojnë tre emigrantë në një kamion në Shkup

Tre emigrantë të paligjshëm u zbuluan të fshehur mes kutive të mallrave në një kamion, gjatë një kontrolli të detajuar në Kompleksin Doganor në Shkup. Sipas Drejtorisë së Doganave të Maqedonisë së Veriut, të tre janë shtetas të Sudanit dhe u gjetën ndërsa ngarkesa ishte deklaruar për zhdoganim importi.

Doganierët e Doganës Shkup 1 e bënë zbulimin gjatë kontrollit të mallrave me origjinë nga Kina. Sipas njoftimit të Doganave, ngarkesa ishte ngarkuar në portin e Selanikut dhe kamioni ishte vulosur me një vulë greke përpara udhëtimit.

"Doganierët nga Dogana Shkup 1 në Doganën e Shkupit kanë gjetur tre imigrantë të paligjshëm nga Sudani gjatë një kontrolli të detajuar të mallrave të deklaruara për zhdoganim importi. Mallrat, me origjinë nga Kina, janë ngarkuar në portin e Selanikut, pas së cilës kamioni është vulosur me një vulë greke. Tre individët, shtetas të Sudanit, e kanë grisur kabllon në pjesën e përparme të ngarkesës së kamionit dhe janë fshehur midis kutive", njoftuan nga Doganat.

Sipas të njëjtit njoftim, ky është rasti i katërt i emigrantëve të paligjshëm të zbuluar në tre muajt e fundit. Të tre u dorëzuan më pas te Ministria e Brendshme.