Fruthi përhapet në Kosovë: mbi 170 raste që nga maji, të gjithë të pavaksinuar

Një rast i ri me fruth pothuajse çdo ditë: kështu e përshkruajnë infektologët valën e sëmundjes që ka përfshirë Kosovën që nga muaji maj.

Të dhënat më të fundit të Institutit Kombëtar të Shëndetësisë Publike flasin për mbi 170 raste të konfirmuara deri më tani, një rritje e ndjeshme që i ka vënë në gatishmëri mjekët e sëmundjeve infektive.

Në Klinikën e Infektivës, sipas drejtoreshës Vera Berisha Ndrejaj, aktualisht janë të shtruar tre pacientë. Pjesa tjetër e të prekurve janë lëshuar për t'u kuruar në shtëpi, me rekomandimin që të rikthehen nëse u nevojitet, pasi e kanë kaluar fazën e infeksionit dhe nuk rrezikohen më. Klinika, shton ajo, i teston të gjitha rastet e dyshimta dhe shtron në spital çdo pacient që ka nevojë për trajtim spitalor.

Më shqetësuese se numrat është një e dhënë tjetër: sipas Berisha Ndrejajt, të prekurit kanë qenë kryesisht persona të pavaksinuar. "Pesha e kësaj sëmundjeje është shumë e rëndë sepse komplikimet janë shumë të rënda, janë të mundshme dhe si sëmundje është shumë kontagjenioze dhe një ambient ku është një pacient i sëmurë me morbill, probabilisht mund të sëmuren të gjithë ata persona që gjenden në atë ambient e që janë të pavaksinuar. Të gjitha rastet që i kemi pasur kanë qenë të pavaksinuar", deklaroi drejtoresha e klinikës.

Kjo pamje ka rikthyer në qendër debatin për vaksinimin e fëmijëve. Gazetari i shëndetësisë Bujar Vitia u bëri thirrje prindërve që t'i vaksinojnë fëmijët dhe institucioneve që të bëjnë më shumë për t'i informuar ata.

"Është shqetësuese dhe e rrezikshme sa i përket shëndetit të fëmijëve tanë, është krejt e papërgjegjshme nga prindërit që të refuzojnë t'i vaksinojnë fëmijët e tyre me vaksinën kundër fruthit sepse në këtë mënyrë e rrezikojnë shëndetin e tyre. Konsideroj që duhet shumë më tepër me pas përpjekje prej institucioneve për me i informuar prindërit, drejt në mënyrë shkencore me argumente shkencore se kjo vaksinë nuk shkakton asnjë efekt anësor", tha Vitia.

Sipas tij, prindërit duhet të marrin informacion të mbështetur në argumente shkencore, në mënyrë që të mos bien pre e dezinformatave që qarkullojnë rreth vaksinës.