Mbi 2.500 të arrestuar: Lecornu premton ndalesa të reja qarkullimi në Francë

Franca nuk po heq dorë nga ndalesat e qarkullimit. Kryeministri Sebastien Lecornu njoftoi të martën se masa të reja të tilla do të vendosen aty ku do të jetë e nevojshme, ndërsa autoritetet përpiqen të rimarrin kontrollin pas trazirave që përfshinë vendin gjatë fundjavës.

Në një postim në rrjetin X, Lecornu shpjegoi se vendimi nuk do të merret nga qendra: autoritetet lokale do të bashkërendohen me kryetarët e bashkive për të gjykuar nëse duhet ose jo të ndalohet qarkullimi në prefekturat përkatëse.

Njoftimi erdhi pas një nate pa trazira. Sipas policisë, nata e së hënës kaloi pa asnjë incident të madh në të gjithë Francën, një qetësi e brishtë pas kaosit të fundjavës.

Të shtunën, më shumë se gjysmë milioni njerëz dolën në rrugë anembanë vendit. Protestat bashkuan dy rryma: studentët që kërkojnë kushte më të mira arsimimi dhe grupet që kundërshtojnë koston e lartë të jetesës. Në shumë vende, demonstratat u kthyen në grabitje dhe zjarrvënie, ndërsa numri i të arrestuarve kaloi 2.500. Shpërthimi pasoi javë të tëra protestash studentore për standardet e arsimit.

Qeveria tani ka nisur një seri takimesh për të frenuar trazirat. Ministrja franceze e Teknologjisë Dixhitale, Anne Le Henanff, do të takohej të martën me drejtuesit e rrjeteve sociale për të diskutuar protestat. Një ditë më parë, ajo kishte shkruar në X se mallrat e grabitura gjatë fundjavës po shiten në internet dhe u kërkoi platformave t'i heqin këto shpallje.

Presioni mbi rrugën nuk ka rënë. Protestuesit kanë bërë thirrje për demonstrata të reja këtë të shtunë, por sindikatat kryesore të Francës nuk e kanë mbështetur këtë thirrje. Përfaqësuesit e tyre pritet të takohen me Lecornun të mërkurën, ndërsa të enjten kryeministri do të zhvillojë bisedime me partitë politike për protestat.

Trazirat bien në një moment të ndjeshëm politik. Zgjedhjet presidenciale janë parashikuar për prill dhe maj të vitit të ardhshëm, dhe presidenti Emmanuel Macron nuk mund të kandidojë sërish për shkak të kufirit prej dy mandatesh. Në sondazhe kryeson Marine Le Pen, liderja e Tubimit Kombëtar të ekstremit të djathtë, ndërsa në vendin e dytë renditet Jean-Luc Melenchon, kandidati i së majtës radikale dhe drejtuesi i partisë Franca e Pabindur. Të dy janë akuzuar se po i shfrytëzojnë protestat në prag të votimit.

Nga ana e studentëve, zëri është i ashpër. Alice Cohen-Morzadec, zëdhënëse e Unionit të Studentëve të Francës, i tha Al Jazeeras se demonstratat ishin një "shpërthim" zemërimi ndaj politikave të Macronit, të cilat, sipas saj, i kanë "shkatërruar" kushtet e jetesës së studentëve.

"Një student në dy nuk mund të ushqehet siç duhet. Një student në tre nuk ka një shtëpi të përhershme ku të jetojë. Nuk mund të studiojmë në këto kushte", deklaroi Cohen-Morzadec.