ReklamëHapësirë reklame
ReklamëHapësirë reklame
Reklamë
Brenda pesë ditësh, policia franceze ka ndaluar më shumë se 5 000 persona gjatë protestave dhe bllokadave të liceeve, shumica dërrmuese të mitur. Qeveria fajëson La France insoumise, ndërsa nxënësit thonë se nuk kanë marrë asnjë masë konkrete dhe paralajmërojnë vazhdimin e lëvizjes.
Më shumë se 5 000 persona janë ndaluar në Francë që nga e hëna, në kuadër të mobilizimit të nxënësve të shkollave të mesme që po bllokojnë liceet. Vetëm të premten, më 2 tetor, forcat e rendit ndaluan 1 747 persona, pak më pak se 1 954 të ndaluarit e së enjtes. Shifrat i bëri publike ministri francez i Brendshëm, Laurent Nuñez.
Të premten mobilizimi preku 735 shkolla. Pranë 158 prej tyre u regjistrua "dhunë urbane", tha ministri. Sipas tij, "85 %" e të ndaluarve janë të mitur dhe shumica janë nxënës liceu. "Kjo nuk do të thotë se janë nga liceu", sqaroi Nuñez, duke iu referuar shkollave pranë të cilave u bënë arrestimet.
I pyetur nëse do t'u kërkonte forcave të rendit më shumë përmbajtje, ministri u përgjigj se policia ndërhyn "sistematikisht" sa herë ka trazira, dëmtime apo dhunë. "Këto janë udhëzimet që jap unë", shtoi ai.
Nuñez e cilësoi mobilizimin "befasues" për shkak të "përmasave të mëdha" që ka marrë. Ai e lidhi atë me "rolin e rrjeteve sociale" dhe me partinë La France insoumise (LFI). Ministri e akuzon këtë parti se ka "nxitur nxënësit të bllokojnë liceet, të protestojnë" dhe se ka mobilizuar "struktura dhe sindikata të ultra së majtës". Sipas tij, kjo ka "lejuar që lëvizja të marrë njëfarë përmase", por "dhuna u ka dalë krejtësisht nga duart".
Akuza e ministrit vjen një ditë pasi zyra e kryeministrit (Matignon) e kishte cilësuar LFI-në si "zanafillën" e lëvizjes dhe kishte denoncuar një "manovër" politike.
Kjo linjë e qeverisë u kundërshtua nga Glucksmann, eurodeputet i Place publique dhe kandidat në zgjedhjet paraprake të së majtës, edhe pse ai vetë është kundërshtar i LFI-së. Në një intervistë për Le Parisien, ai tha se përgjigjja e qeverisë "nuk është në lartësinë e duhur". Ai dënoi edhe "dhunën e vandalëve", e cila sipas tij rrezikon të "mbysë një lëvizje nxënësish, kërkesat e së cilës janë krejtësisht legjitime".
"Ta reduktosh kështu lëvizjen e nxënësve te militantët e LFI ose te 'manovrat' politike është patetike", deklaroi Glucksmann. Thirrjen e ministrit të Arsimit drejtuar prindërve ai e quajti "shenjë e një ministri në panik që nga dita e parë e kontestimit". Për të, problemi qëndron te "këta profesorë të pazëvendësuar, këto shkolla të rrënuara, shërbimet mjekësore dhe shëndeti mendor të braktisur, këta mësues të paguar keq, këto licee profesionale të trajtuara si rrugë pa krye". Ai i bëri thirrje qeverisë që ta "dëgjojë dhe të mos e shtypë më" zemërimin e nxënësve.
Në debat u përfshi edhe ish-presidenti François Hollande. Në një video të publikuar në rrjetin social X, ai tha se mobilizimi u përcjell drejtuesve politikë një "mesazh" për kushtet e mësimdhënies. "Ka një lëvizje dhe ajo është e fuqishme", tha Hollande. Ai kërkoi që qeveria të "gjejë zgjidhjet" së bashku me rajonet dhe departamentet, por hodhi poshtë dëmtimet si mjet veprimi. "Rinia [duhet parë] jo si problem, si barrë, por si investim", tha ai, duke kërkuar "t'i jepet përparësi rinisë".
Për Hollande-in, protestat e nxënësve nuk janë diçka e re. Dhjetë vjet më parë, në pranverën e vitit 2016, dhjetëra mijëra të rinj dolën në rrugë dhe shumë licee u bllokuan në shenjë proteste kundër ligjit të punës, të cilin e mbrojti ministrja Myriam El Khomri gjatë presidencës së tij. Hollande nuk e tërhoqi atë tekst. Në maj të atij viti ai deklaroi: "Nuk do të tërhiqem".
Ndërkohë, dëmet materiale po rëndojnë. Në Nantes, salla dhe recepsioni i liceut Nelson-Mandela u shkatërruan nga zjarri të enjten. Sipas një vlerësimi të parë të rajonit Pays de la Loire, punimet e riparimit kushtojnë të paktën 2 milionë euro. Ekspertët duhet të përcaktojnë ende gjendjen e strukturës së çatisë. Liceu do të mbetet i mbyllur deri në pushimet e Gjithë Shenjtorëve dhe mësimi do të rifillojë në distancë nga mesi i javës së ardhshme. Në gjithë rajonin, dymbëdhjetë licee kanë pësuar dëme gjatë ditëve të fundit. Kostoja e përkohshme arrin të paktën 3 milionë euro.
Në departamentin Hauts-de-Seine, rreth 200 persona janë mbajtur në arrest policor në lidhje me bllokadat e liceeve. Prokurori i Republikës në Nanterre, Yves Badorc, deklaroi se përgjigjja e drejtësisë duhet të jetë "e shpejtë" dhe "parandaluese", por edhe "edukative".
Dialogu me qeverinë nuk e ka qetësuar situatën. Të premten pasdite, përfaqësuesit e nxënësve u takuan me ministrin e Arsimit Kombëtar, Laurent Geffray. Pas takimit ata deklaruan se nuk kanë marrë "masa konkrete" dhe u bënë thirrje nxënësve ta vazhdojnë lëvizjen edhe javën e ardhshme.
Gurë kalldrëmi të shkulur nga Parku Rinia, gaz lotsjellës dhe mbi 100 të arrestuar: protestat kundër qeverisë në Shqipëri hynë në ditën e shtatë pa asnjë shenjë qetësimi. Kryeministri Rama i quan pjesë të një sulmi të koordinuar, ndërsa protestuesit fajësojnë policinë për dhunën.
