Franca u kërkon shtetasve të vet vigjilencë në Kosovë më 16 shtator, ditën e aktgjykimit në Hagë

Në të gjitha qytetet e Kosovës, nga ora 10:00 e 16 shtatorit, pritet një valë tubimesh të mëdha politike. Për shkak të tyre, Ministria e Jashtme e Francës ka lëshuar një njoftim me thirrje për vigjilencë ndaj shtetasve francezë që ndodhen në Kosovë, të cilët këshillohen të mos afrohen dhe të kufizojnë lëvizjet.

"Tubime, thirrje për vigjilencë. Më 16 shtator, duke filluar nga ora 10:00, janë planifikuar tubime të mëdha politike në të gjitha qytetet e Kosovës. Shtetasit francezë këshillohen të qëndrojnë larg këtyre tubimeve. Ata duhet të shmangin udhëtimet jo të domosdoshme brenda qyteteve dhe në gjithë vendin deri në fund të ditës", thuhet në njoftimin e Ministrisë së Jashtme të Francës.

Thirrja, e paralajmëruar edhe si "lajm i urgjent", nuk përmend arsyen pse janë planifikuar këto tubime.

Data përkon me një zhvillim të madh gjyqësor: më 16 shtator shpallet aktgjykimi në rastin "Thaçi dhe të tjerët" në Gjykatën Speciale në Hagë.

Franca nuk është e vetmja që ka ngritur nivelin e kujdesit. Edhe përfaqësi të tjera diplomatike dhe misione ndërkombëtare u kanë kërkuar punëtorëve dhe shtetasve të vendeve ose organizatave që përfaqësojnë të shmangin tubimet, udhëtimet dhe daljet e panevojshme jashtë.