Franca tërhiqet nga dyfishimi i tarifave mjekësore pas revoltës së pacientëve

Qeveria franceze ka bërë një hap prapa nga një prej masave më të kontestuara të reformës së saj shëndetësore. Dyfishimi i tavanit vjetor të tarifave mjekësore që paguajnë të siguruarit – nga 100 në 200 euro – nuk do të zbatohet menjëherë, pas kundërshtimit të shoqatave të pacientëve dhe të disa profesionistëve të shëndetësisë.

Vendimin e njoftoi ministrja franceze e Shëndetësisë, Stéphanie Rist, në një intervistë për gazetën "Le Figaro". Ajo pranoi hapur se zgjedhja fillestare kishte mundur të dukej "brutale" dhe se "dyfishimi i njoftuar nuk u kuptua".

Rreth një muaj më parë, qeveria kishte njoftuar rritjen nga 100 në 200 euro në vit të shumës maksimale të tarifave që të siguruarit paguajnë për kutitë e barnave, aktet paramjekësore, transportin dhe konsultat mjekësore. Qëllimi i deklaruar ishte frenimi i rritjes së shpenzimeve shëndetësore.

Por masa u kritikua ashpër. Kundër saj u ngritën federata kryesore e pacientëve, France Assos Santé, sindikata e mjekëve MG France dhe sindikata e infermierëve Convergence infirmière.

"Shoqatat, profesionistët e shëndetësisë, pacientët na thanë se një dyfishim i menjëhershëm i tavanit në një herë të vetme dukej i tepruar. Ne e dëgjuam këtë", theksoi Rist. Sipas saj, tashmë po punohet për një zgjidhje tjetër: "Ne punojmë tani për një reformë të drejtë, të mbështetur në një indeksim ndaj inflacionit që nga viti 2005. Rritja do të jetë rrjedhimisht dukshëm më e ulët se ajo e parashikuar fillimisht."

Ministrja e mbrojti kthesën si më të arsyeshme: "Ne konsideruam se një korrigjim i mbështetur në koston e jetesës ishte më i drejtë dhe më i lexueshëm. Më mirë një reformë e sigurt tani, sesa një më hipotetike nesër." Megjithatë, ajo nënvizoi se "kursime të drejta dhe të përshtatshme" e "masa efikasiteti" mbeten "të nevojshme për të ruajtur në mënyrë të qëndrueshme aftësinë tonë kolektive për të kuruar".

E pyetur për të ashtuquajturën TVSH sociale – që do të kompensonte uljen e kontributeve mbi punën me një rritje të TVSH-së mbi konsumin, duke i kaluar një pjesë Sigurimeve Shoqërore – Rist vlerësoi se ajo nuk është "në vetvete, një zgjidhje e mjaftueshme" për të ruajtur modelin e mbrojtjes sociale.

Konteksti financiar mbetet i tensionuar. Buxheti i Sigurimeve Shoqërore për vitin 2026 parashikon një rritje të shpenzimeve shëndetësore prej 3,1 për qind, ose 8,2 miliardë euro, ndërkohë që sipas ministres shenjat e tejkalimeve në kujdesin ambulator po shfaqen tashmë.

Rist foli edhe për lejen e re të lindjes, në fuqi që nga 1 korriku për të gjithë prindërit e fëmijëve të lindur në vitin 2026, nisja e së cilës u shoqërua me shumë mangësi në pagesa. "Ligji i votuar nga Parlamenti parashikon që pagesa e parë të vijë në fillim të gushtit për një leje të nisur në fillim të korrikut. Ne nuk konstatojmë anomali. Në disa raste, dosjet u treguan më të ndërlikuara, dhe në të tjera kërkesa nuk ishte transmetuar nga punëdhënësi. Parlamenti dëshiroi që dispozitivi të nisë në vitin 2026 në vend të vitit 2027. Pavarësisht vështirësive të zbatimit, kjo është një premtim i mbajtur", tha ajo.