Fotokopjet nën lupë: inspektorët e tregut kontrollojnë bizneset në Prishtinë e Gjilan

Bizneset që fotokopjojnë, riprodhojnë dhe shpërndajnë materiale të mbrojtura nga e drejta e autorit janë vënë nën kontroll në rajonet e Prishtinës dhe të Gjilanit. Inspektimet janë zhvilluar nga ekipet e Inspektoratit Qendror të Mbikëqyrjes së Tregut (IQMT), si pjesë e një vale kontrollesh të intensifikuara nga Ministria e Industrisë, Ndërmarrësisë, Tregtisë dhe Inovacionit (MINTI).

Sipas MINTI-t, qëllimi i kontrolleve është verifikimi i respektimit të kërkesave ligjore gjatë riprodhimit dhe përdorimit të materialeve të mbrojtura, si dhe parandalimi i përdorimit, riprodhimit apo shfrytëzimit të paautorizuar të veprave të mbrojtura.

Baza ligjore e aksionit janë Ligji Nr. 08/L-205 për të Drejtën e Autorit dhe të Drejtat e Përafërta dhe kompetencat e përcaktuara me Ligjin Nr. 08/L-279 për Inspektoratin Qendror të Mbikëqyrjes së Tregut.

MINTI dhe IQMT kanë bërë të ditur se përmes këtyre aksioneve synojnë mbrojtjen e të drejtave të autorëve dhe titullarëve të të drejtave, rritjen e ndërgjegjësimit të operatorëve ekonomikë dhe krijimin e një tregu ku veprimtaria ekonomike zhvillohet në përputhje me ligjin.

Sa subjekte janë kontrolluar, çfarë është gjetur dhe nëse është shqiptuar ndonjë masë, nuk është bërë e ditur. Ministria ka njoftuar se mbikëqyrja do të vazhdojë edhe në rajone të tjera të Kosovës, duke u mbështetur edhe në ankesat dhe informacionet e pranuara nga konsumatorët për raste të dyshuara të shkeljes së të drejtës së autorit dhe piraterisë.