Fole kontrabande në një "Citroen": 30 kilogramë duhan të fshehur në ulëse dhe fenerë

Bagazhi, ulëset e përparme dhe të pasme, madje edhe pjesa e dritave të përparme ishin kthyer në depo të fshehta. Aty, zyrtarët e Policisë Kufitare gjetën rreth 30 kilogramë duhan dhe 164 shteka cigare, gjatë një kontrolli në brezin kufitar me Serbinë, në Komunën e Kamenicës.

Aksioni u zhvillua më 17 shtator, në kuadër të Planeve Operative "Shtatori 2026" dhe "Gatishmëria Vepruese 2026", pasi ishin siguruar informata operative. Njësitet e Policisë Kufitare ndërhynë në fshatrat e brezit kufitar Rogoqicë-Novosellë, ku lokalizuan dhe ndaluan një rast të dyshuar të kontrabandimit të mallrave.

Sipas Policisë së Kosovës, gjatë vëzhgimit u ndalua një automjet "Citroen C5" me ngjyrë hiri dhe me targa të Serbisë, që lëvizte nga Rogoqica drejt Novosellës. Në timon ishte A.A., i lindur në Konqul në vitin 1972 dhe me vendbanim në Gjilan.

Kontrolli i veturës nxori në pah hapësirat e modifikuara, ku ishte fshehur ngarkesa: 60 paketime nga 500 gramë duhan, gjithsej rreth 30 kilogramë, si dhe 164 shteka cigare me nga 10 paketime secila dhe katër pako të vogla me cigare, të markave të ndryshme. E gjithë sasia u sekuestrua.

Policia dyshon se malli ishte destinuar për tregun ilegal, me qëllim shmangien e procedurave doganore dhe përfitimin e kundërligjshëm financiar. Veprimet operative dhe procedurale janë zhvilluar në koordinim me prokurorin kompetent, ndërsa rasti po trajtohet dhe hetohet nga Policia Kufitare, NJHR Jugu. Nuk është bërë e ditur nëse shoferi është arrestuar.

Policia e Kosovës ka njoftuar se do t'i vazhdojë veprimet kundër kontrabandës, krimit ndërkufitar dhe aktiviteteve të tjera ilegale.