Flamuri i UÇK-së në hyrje të çdo shkolle: kërkesa zyrtare e Drejtorisë së Arsimit në Prishtinë

Në hyrjet kryesore të shkollave publike të Prishtinës, pranë flamurit të Republikës së Kosovës, duhet të valëvitet edhe flamuri i Ushtrisë Çlirimtare të Kosovës. Kërkesa vjen nga drejtori i Arsimit në Prishtinë, Arianit Elshani, i cili ua ka përcjellë atë me shkresë zyrtare drejtorëve të të gjitha institucioneve arsimore publike të kryeqytetit.

Në shkresë, Elshani thekson se UÇK-ja është pjesë e pandashme e historisë së çlirimit të Kosovës dhe se lufta e sakrifica e saj për lirinë e vendit përbëjnë një kapitull të rëndësishëm të historisë së re të vendit. Sipas tij, shkollat nuk janë vetëm hapësira ku nxënësit marrin dije, por edhe vende ku formohet kujtesa historike dhe qytetare e brezave të rinj.

"Liria që gëzojmë sot ka një histori. Dhe ajo histori duhet të kujtohet, të respektohet dhe t'u përcillet brezave që vijnë", thuhet në shkresën e Drejtorisë së Arsimit.

Drejtoria ka kërkuar që vendosja e flamurit të UÇK-së të bëhet në mënyrë dinjitoze dhe të njëtrajtshme në të gjitha institucionet arsimore publike të kryeqytetit. Në shkresë nuk është bërë publik një afat konkret për zbatim.