Flamuri gjigant kuqezi mbulon sheshin e Prishtinës, mijëra zëra kërkojnë "Liri për çlirimtarët"

Një flamur kuqezi me përmasa të jashtëzakonshme, i mbajtur nga dhjetëra duar, u shpalos mbrëmjen e së dielës në sheshin "Skënderbeu" në Prishtinë. Mbi të, stema e Ushtrisë Çlirimtare të Kosovës. Përreth, qindra qytetarë që brohorisnin "UÇK" dhe "Liri për çlirimtarët".

Grumbullimi nisi para orës 21:00, koha për të cilën ishte paralajmëruar protesta kundër aktgjykimit të Dhomave të Specializuara në Hagë ndaj ish-krerëve të UÇK-së. Turma vazhdoi të rritej, ndërsa disa rrugë në qendër të kryeqytetit filluan të bllokohen nga numri i madh i pjesëmarrësve.

Në shesh ishin qytetarë të moshave të ndryshme, të ardhur nga qytete të ndryshme të Kosovës. Krahas flamurit gjigant, pjesëmarrës të tjerë mbanin flamuj dhe pankarta.

Policia e Kosovës kishte njoftuar më herët se kishte angazhuar kapacitete njerëzore dhe logjistike për mbarëvajtjen e protestës, për ruajtjen e rendit dhe të qetësisë publike, si dhe për menaxhimin e trafikut në kryeqytet. Institucioni kishte sqaruar gjithashtu se asnjë qytetar nuk ndalohet për mbajtjen e flamurit me stemën e UÇK-së, duke iu referuar një rasti të mëhershëm ku arsyeja e ndërhyrjes kishte qenë vozitja e rrezikshme.

Aktgjykimi i shpallur nga gjykata me seli në Hagë ndaj ish-krerëve të UÇK-së mbetet shkaku i drejtpërdrejtë i daljes masive në shesh.