Flakët arritën te Gjykata e Lartë, Gogu: Zjarri në gjykatë godet të drejtën e qytetarëve

Zjarri arriti deri te Gjykata e Lartë e Shqipërisë, ndërsa raportohet se edhe hyrja e Bankës së Shqipërisë pësoi dëmtime. Nuk dihet ende se kush e shkaktoi zjarrin dhe as kur ndodhi saktësisht incidenti.

Ministri i Drejtësisë, Toni Gogu, reagoi duke theksuar se të dyja godinat e prekura nuk kanë lidhje me ekzekutivin. "Dy institucione të pavarura. Asnjëra nuk është zyrë qeveritare. Të dyja i shërbejnë vendit dhe qytetarëve të tij", deklaroi ai.

Gogu i dënoi aktet e dhunës dhe hoqi një vijë të qartë mes protestës dhe dëmtimit të institucioneve. "Edhe ata që protestojnë, edhe ata që janë të zemëruar me qeverinë kanë të njëjtën të drejtë për drejtësi. Protesta është e drejtë. Dhuna nuk është protestë", tha ministri.

Sipas tij, "vënia e zjarrit në një gjykatë nuk godet qeverinë, por të drejtën e qytetarëve për drejtësi".

Ministri falënderoi zjarrfikësit për ndërhyrjen dhe shprehu solidaritet me gjyqtarët dhe stafin e Gjykatës së Lartë. Ai konfirmoi gjithashtu se Ministria e Drejtësisë është e gatshme të ofrojë mbështetje brenda kompetencave të saj ligjore, duke respektuar pavarësinë e gjyqësorit.

"Njerëzit nuk duhet të paguajnë çmimin e dhunës. Dera e drejtësisë duhet të mbetet e hapur për të gjithë", përfundoi Gogu.