Fjalimi i heshtur për Hagën: zëvendëskryesuesi i KPK-së flet për gjashtë anëtarë familjeje të humbur në luftë

Mbledhja e Këshillit Prokurorial të Kosovës e së premtes nisi si çdo mbledhje tjetër. Kryesuesi i KPK-së, Arian Gashi, nuk e preku vendimin e Gjykatës Speciale në Hagë ndaj Hashim Thaçit, Jakup Krasniqit, Kadri Veselit dhe Rexhep Selimit. Reagimi erdhi nga karrigia e zëvendëskryesuesit.

Dardan Vuniqi, zëvendëskryesues i KPK-së, mbajti një fjalim emocional, nuk u përmend asnjë emër të ish-krerëve të Ushtrisë Çlirimtare të Kosovës të dënuar nga gjykata në Hagë. Në vend të kësaj, ai nisi nga e kaluara e familjes së vet: gjashtë anëtarë të humbur gjatë luftës, një invalid në familje që i bart ende plagët në trup dhe kujtime të një fëmijërie të përjetuar në luftë.

Nga ajo përvojë personale Vuniqi kaloi te mesazhi institucional. Sipas tij, përgjegjësia penale është individuale dhe secili duhet të gjykohet vetëm për veprimet që i atribuohen, përmes një procesi të drejtë. Drejtësia, theksoi ai, duhet të mbështetet në ligj, në prova dhe në standarde të njëjta për të gjithë, duke shtuar se askush nuk kërkon që dhimbja e njërës palë të vlejë më shumë se e tjetrës, por as më pak.

Fjalimi u mbajt në një moment kur vendimi i Gjykatës Speciale ka prodhuar reagime të gjera në Kosovë, përfshirë protesta. Dënimet konkrete dhe akuzat për të cilat u shpallën fajtorë katër ish-krerët e UÇK-së nuk u trajtuan në mbledhjen e Këshillit Prokurorial.