Film serb për korpusin e Prishtinës: Llazareviqi, i dënuar për krime lufte, në premierë

Në premierën e një dokumentari kushtuar korpusit të Prishtinës, në Nish, mes zyrtarëve të lartë serbë u ul edhe Vlladimir Llazareviqi, ish-komandanti i këtij formacioni, i dënuar për krime lufte të kryera në Kosovë. Filmi, me titull "Korpusi i Prishtinës: Na komandon atdheu", u promovua nga vetë Ministria e Mbrojtjes në Beograd.

Dokumentari është prodhim i qendrës filmike ushtarake "Zastava Film" dhe i kushtohet një formacioni ushtarak serb, dy komandantët e të cilit u dënuan për krime lufte nga Tribunali i Hagës.

Ministria serbe e prezantoi filmin si dëshmi të heroizmit dhe të sakrificës së ushtarëve. Ministri i Mbrojtjes i Serbisë, Bratislav Gashiq, shkoi më tej dhe akuzoi UÇK-në, duke e cilësuar atë organizatë terroriste.

Në Kosovë, promovimi ka nxitur reagime. Kritikët vënë në dukje se filmi i paraqet veprimet e korpusit vetëm nga këndvështrimi ushtarak serb, duke heshtur për krimet ndaj popullsisë civile në Kosovë. Njohësit e çështjeve të sigurisë e shohin këtë si përpjekje për ta rishkruar historinë e luftës dhe për ta ushqyer narrativën nacionaliste serbe. Ky nuk është filmi i parë i këtij lloji: më herët në Serbi ishte realizuar edhe një dokumentar për luftën në Koshare.

Nuredin Ibishi, njohës i çështjeve të sigurisë, e lidh filmin me një fushatë më të gjerë: "Kjo tregon hipokrizinë e politikës serbe, por edhe propagandën me të cilën, deri diku, kanë arritur ta bindin një pjesë të opinionit, sidomos me rastin e krijimit të Gjykatës Speciale, por edhe përmes provave të falsifikuara dhe të fabrikuara. Tani mundohen që opinionin e vet ta nxisin për një luftë të fuqishme që kanë bërë në Kosovë, por me një përfundim melankolik, pasi ata nuk ia dolën".

Instituti për Studime të Luftës Hibride "Octopus" e sheh çështjen edhe në planin gjeopolitik. Sipas institutit, promovimi i narrativave nacionaliste nuk mund të ndahet nga orientimi politik i Serbisë, e cila synon të përfitojë nga Perëndimi, ndërkohë që forcon afërsinë me Rusinë.

"Diskursi nacionalist në Serbi duhet të marrë përgjigje të qartë dhe të vendosur nga ana e Perëndimit, në veçanti nga Brukseli, për shkak se Serbia do të përpiqet, si deri më tani, ta ruajë pozicionin e dyfishtë të përfitimit, duke marrë fonde nga Perëndimi dhe duke u rreshtuar gjithnjë e më shumë me Rusinë", tha Arben Fetoshi nga Instituti "Octopus".