Filipçe kthen në Kuvend propozimin për pagë minimale 600 euro, sfidon Mickoskin

Opozita në Maqedoninë e Veriut po e kthen betejën për pagat në qendër të agjendës parlamentare. Kryetari i LSDM-së, Venko Filipçe, njoftoi se partia e tij do ta dorëzojë sërish në Kuvend propozim-ligjin për rritjen e pagës minimale në 600 euro.

Filipçe tha se propozimi do të dorëzohet në fillim të shtatorit, sapo Kuvendi të rifillojë punën. Sipas tij, niveli aktual i pagës minimale nuk mjafton për të mbuluar as shpenzimet bazë të jetesës.

"Qytetarët nuk mund të mashtrohen. Shifrat që i thotë kryeministri, dukshëm nga një botë në të cilën jeton vetëm ai dhe grupi i tij i vogël, qytetarët nuk i ndjejnë. Ata shohin portofolat bosh dhe frigoriferët bosh", deklaroi Filipçe në një konferencë për shtyp.

Ai argumentoi se nëse treguesit ekonomikë janë aq pozitivë sa pretendon qeveria, atëherë rritja e pagës minimale në 600 euro duhet të jetë ndër masat e para. Sipas Filipçes, paga minimale sot është 26.000 denarë.

"Jo 26.000 denarë siç është tani, por aq sa u nevojitet njerëzve për të mbuluar nevojat bazë, shpenzimet bazë, veçanërisht kur fillon viti shkollor dhe kur shpenzimet e jetesës rriten shumë", theksoi kreu i LSDM-së.

Përveç pagës minimale, Filipçe paralajmëroi edhe kërkesë për rritje pagash në disa sektorë, veçanërisht në shëndetësi dhe arsim. Ai u referua te masat që, sipas tij, ishin realizuar gjatë qeverisë së mëparshme të udhëhequr nga LSDM, kur pagat bazë të specialistëve dhe mjekëve u rritën me 40 për qind, njësoj si ato të të punësuarve në arsim.

Rritja e pagave, sipas tij, është e domosdoshme për shkak të rritjes së kostos së jetesës, dhe me këtë nismë partia jep përgjigjen e saj ndaj politikave ekonomike të qeverisë aktuale.

Filipçe drejtoi kritika të drejtpërdrejta ndaj ekzekutivit të kryeministrit Hristijan Mickoski. "Qeveria e udhëhequr nga Hristijan Mickoski tashmë ka filluar vitin e tretë të punës së saj dhe në asnjë fushë ne nuk shohim rezultate. Nuk shohim rezultate në fushën e ekonomisë, në shëndetësi, në arsim, në bujqësi", tha ai.