FBI i kthen Egjiptit 48 objekte të lashta, trafikanti i dyshuar ka vdekur

Dyzet e tetë objekte të lashta egjiptiane kanë marrë rrugën e kthimit drejt vendit të origjinës, pas një hetimi të Ekipit të Krimit Kundër Artit të FBI-së. Koleksioni i dorëzuar Egjiptit përbëhet nga figurina, amuleta dhe pajisje varresh që datojnë nga periudhat faraonike, romake dhe kopte.

"Këto objekte përfaqësojnë historinë e pasur të Egjiptit. Shumica e tyre janë mijëravjeçare dhe rëndësia e tyre kulturore për popullin egjiptian është e paçmuar", tha ndihmësdrejtori i FBI-së, Patrick Grandy.

Hetimi, megjithatë, nuk është mbyllur me kthimin e objekteve. Allen Grove, agjent special në Ekipin e Krimit Kundër Artit, tha se hetuesit po punojnë ende për të identifikuar personat që mund të kenë qenë të përfshirë në trafikimin e këtyre sendeve.

"Pavarësisht se e dimë që trafikanti i dyshuar tani ka vdekur, ne po kërkojmë të identifikojmë bashkëpunëtorë të tjerë. Dhe përveç kësaj, kemi arsye të besojmë se mund të ketë më shumë sende atje jashtë", tha Grove.

Deklarata e tij lë të kuptohet se pjesa e rikuperuar mund të jetë vetëm një fragment i një rrjedhe më të gjerë objektesh të nxjerra nga Egjipti dhe të mbetura ende të pagjetura.