Faqe “muzikore” me emra shqiptarë nxisnin djegie dhe dhunë në Facebook, alarmon eksperti

Kishin emra shqiptarë, por në Facebook ishin regjistruar si faqe të kategorisë “Musician/Band”. Nga këto llogari, sipas ekspertit të sigurisë kibernetike Halil Berisha, kanë dalë ditëve të fundit thirrje për djegie institucionesh, përplasje fizike dhe ndëshkim të kundërshtarëve politikë.

Hulumtimi i Berishës gjen se disa prej tyre kanë vepruar në mënyrë të koordinuar: kanë lënë komente të njëjta ose shumë të ngjashme nën postimet e mediave dhe të subjekteve politike. Shënjestër e mesazheve nxitëse, të shpërndara në mënyrë të përsëritur, kanë qenë institucionet, deputetët, protestuesit dhe gazetarët.

Sipas Berishës, intensiteti i këtyre mesazheve u rrit me afrimin e vendimit të 16 shtatorit dhe të zhvillimeve që lidhen me Gjykatën Speciale. Ritmi i përsëritur i publikimit dhe ngjashmëria mes përmbajtjeve, vlerëson ai, janë elemente të një fushate të koordinuar. Modelin e ka krahasuar me taktika të përdorura në operacione të njohura të ndikimit rus, një lidhje që Radio Evropa e Lirë, së cilës eksperti i foli, nuk e ka verifikuar në mënyrë të pavarur.

“Thirrjet për dhunë nuk janë vetëm ndaj njërës palë, por drejtohen ndaj të gjithëve, në mënyrë që të krijohet përplasje në rrjete sociale dhe, rrjedhimisht, të nxitet dhuna”, ka deklaruar Berisha.

Pas publikimit të hulumtimit, disa nga profilet e identifikuara janë zhdukur. Sipas Berishës, disa janë mbyllur, ndërsa të tjera kanë ndryshuar emrat dhe identitetin. Mes atyre që janë mbyllur janë dy profile që kishin publikuar thirrje për djegie dhe paralajmërime për “luftë civile”. Për Berishën, ky ndryshim i papritur identiteti dhe mbyllja e profileve janë një tregues shtesë se llogaritë nuk kanë funksionuar në mënyrë autentike.

Përmbajtjet që nxisin dhunë kanë shënuar, sipas ekspertit, një rritje të dukshme ditëve të fundit, nga thirrjet për djegie institucionesh dhe sulme fizike deri te kërcënimet për vrasje. Megjithatë, jo çdo postim i tillë mund të quhet automatikisht pjesë e një fushate të koordinuar. Dema vlerëson se në këtë fazë nuk do të ishte e saktë që të gjitha rastet të futen nën ombrellën e një operacioni të përbashkët.

“Ajo që mund të themi është se shohim sjellje të ngjashme dhe narrativa që përsëriten, ndërsa një pjesë e tyre më pas amplifikohen nga përdorues të tjerë”, ka thënë Dema.

Vala e mesazheve vjen në një periudhë të tensionuar politike në Kosovë, ku zhvillimet institucionale dhe çështjet e Gjykatës Speciale kanë ndezur reagime dhe debate.