"Ende gjallë": studenti shqiptar u zhduk në Itali, trupi priti 20 ditë në morg pa emër

"Si je?", e pyeti vëllai. "Ende gjallë", u përgjigj ai. Ishte ora 19:16 e 30 gushtit. Kjo do të ishte fjala e fundit e F. N., një studenti shqiptar 25-vjeçar në Itali. Pas saj ai nuk u përgjigj më.

Trupi i të riut u gjet më 5 shtator në brigjet e lumit Adige, në Grumo, në komunën e San Michele all'Adige, rreth 42 kilometra larg Roveretos, qytetit ku ai jetonte prej pesë vitesh. Askush nuk e lidhi atë gjetje me zhdukjen e tij. Ndërsa familja vazhdonte ta kërkonte edhe për njëzet ditë të tjera, trupi ndodhej në morgun e spitalit Santa Chiara të Trentos. Më 25 shtator, i ati e identifikoi të birin nga fytyra dhe nga një tatuazh në gjoks.

Prokuroria e Trentos ka hapur një dosje për nxitje të vetëvrasjes.

Pasditja e 30 gushtit, sipas rrëfimit të familjes që kanë sjellë mediat italiane, ishte e tensionuar. Rreth tri orë para mesazhit të fundit, i riu u kishte treguar të afërmve se ishte grindur me disa djem shqiptarë dhe se ishte sulmuar prej tyre në Rovereto. Kishte shenja në fytyrë dhe kishte frikë. Babai i kërkoi të shkonte menjëherë te karabinierët. "Kjo është ajo që po mendoj të bëj, babi", i ishte përgjigjur ai. Nuk rezulton që të ketë shkuar ndonjëherë atje.

Pas sulmit ai publikoi edhe një postim të përkohshëm në Instagram, ku në fytyrën e tij duken shenjat. Familja ka ruajtur një pamje të tij. Në orën 17:21 foli sërish me vëllanë, këtë herë nga stacioni hekurudhor i Roveretos. Vëllai mendonte se ai po përgatitej të kthehej në shtëpi.

Të nesërmen, vëllai denoncoi zhdukjen te karabinierët e Fanos. Verifikimet mbi telefonin e çuan kërkimin në Termeno sulla Strada del Vino, në Tirolin e Jugut, rreth 64 kilometra larg Roveretos, ku u identifikua vendndodhja e fundit e celularit. Si arriti ai deri atje mbetet e paqartë: kishte me vete vetëm një çantë të lehtë supi.

Prindërit, që ndodheshin me pushime në Shqipëri, i ndërprenë ato dhe u nisën për në Rovereto. Më 1 shtator ishin te karabinierët. Që nga ajo ditë, babai udhëtonte pa pushim drejt Trentinos dhe mbrapsht, duke e kërkuar të birin pa asnjë rezultat.

Nga mesi i shtatorit, ai iu drejtua avokatit Francesco Bonatesta. Më 18 shtator, avokati i shkroi Komisariatit të Qeverisë për Provincën e Trentos, duke kërkuar aktivizimin e planit provincial për kërkimin e personave të zhdukur. Gjashtë ditë më vonë, më 24 shtator në orën 23:10, karabinierët e Roveretos e thirrën babanë dhe i kërkuan të paraqitej të nesërmen. Aty mori fund kërkimi.

I riu kishte lindur në Fano, ndërsa familja e tij jeton në Colli al Metauro. Në Rovereto ndiqte studimet master në Shkencat Konjitive, në fakultetin e psikologjisë, dhe gjatë verës punonte në një piceri. Nuk është bërë e ditur publikisht nëse dikush është identifikuar për sulmin që ai përshkroi në orët e fundit.