Emra të LVV-së në krye të konkurseve për agjenci shtetërore: kush po fiton pozitat kyçe

Vlora Limani Hajnuni, ish-kandidate për deputete e Lëvizjes Vetëvendosje (LVV), ka rezultuar kandidatja më e suksesshme në konkursin për kryeshef të Agjencisë Kosovare për Pajisje dhe Produkte Medicinale (AKPPM). Ajo grumbulloi gjithsej 83 pikë — 53 nga intervista dhe 30 nga testi me shkrim.

Konkursi për këtë pozitë, me mandat katërvjeçar, ishte hapur më 22 prill 2026. Në garë ishin edhe Agon Hoti dhe Sulltane Havolli. Sipas njoftimit të konkursit, kandidatët e pakënaqur me procesin e rekrutimit kanë të drejtë ankese brenda 30 ditësh.

Limani Hajnuni ka një të kaluar aktive politike. Në zgjedhjet e 9 shkurtit 2025 kishte garuar si kandidate e LVV-së për deputete dhe kishte marrë 7 mijë e 435 vota. Më 16 tetor 2022 ishte zgjedhur nënkryetare e parë e qendrës së LVV-së në Lipjan. Para angazhimit në Vetëvendosje, ajo kishte qenë deputete në Kuvendin e Kosovës nga radhët e Lidhjes Demokratike të Kosovës (LDK) në legjislaturën e shtatë.

AKPPM prej vitesh është udhëhequr me ushtrues detyre të drejtorit ekzekutiv, pa u plotësuar pozita e drejtorit. Disa konkurse për këtë post ishin anuluar pas vendimeve të KPMSHCK-së për shkelje, ndër to edhe konkursi i vitit të kaluar.

Rasti i Limani Hajnunit nuk qëndron i vetmuar. Në një konkurs tjetër, ish-shefi i kabinetit të kryeministrit në detyrë Albin Kurti, Luan Dalipi, ka dalë i pari për postin e Drejtorit Ekzekutiv të Agjencisë së Investimeve dhe Eksportit, në kuadër të Zyrës së Kryeministrit. Sipas njoftimit të Ministrisë së Digjitalizimit dhe Administratës Publike, Dalipi mori 24 pikë në testin me shkrim dhe 56.6 pikë nga intervista, gjithsej 80.6 pikë. Ai kishte drejtuar stafin e kryeministrit për pesë vjet dhe, më 26 shkurt 2026, përmes një statusi në Facebook kishte njoftuar se nuk do ta ushtronte më këtë pozitë.

Në një proces të tretë, Nora Kelmendi, anëtare e Kuvendit Komunal të Prishtinës nga Lëvizja Vetëvendosje, ka dalë më e poentuara për pozitën e Drejtorit Ekzekutiv të Agjencisë Kosovare të Privatizimit (AKP). Kelmendi ka një rrugë të gjatë brenda strukturave të lidhura me LVV-në: ishte drejtoreshë e Gjeodezisë dhe Kadastrit në Komunën e Prishtinës kur kryetar ishte Shpend Ahmeti, gjatë kohës kur ky i fundit ishte pjesë e Vetëvendosjes. Me largimin e Ahmetit nga LVV-ja, ajo bashkë me dy drejtorë të tjerë ishin shkarkuar nga këto detyra.

Në mars të vitit 2020, Kelmendi ishte emëruar këshilltare politike nga Albin Kurti, që në atë kohë mbante pozitën e kryeministrit. Në gusht 2021 mori udhëheqjen e Drejtorisë së Gjeodezisë dhe Kadastrit në Prizren, si pjesë e ekipit të ish-kryetarit të Prizrenit, Mytaher Haskuka. Në zgjedhjet komunale të tetorit 2021 garoi për herë të dytë si asambliste e LVV-së në Kuvendin Komunal të Prishtinës, ndërsa në vitin 2025 fitoi sërish në këtë garë. Kelmendi ka qenë e angazhuar edhe si shefe e stafit të kabinetit të ministrit të Shëndetësisë, Arben Vitia.