Emiratet i presin rrugën ekonomisë iraniane: embargo totale mbi tregtinë me Teheranin

Emiratet e Bashkuara Arabe, partneri më i rëndësishëm tregtar rajonal i Iranit, kanë shpallur të martën një embargo të plotë mbi tregtinë dhe transaksionet me Republikën Islamike. Vendimi godet drejtpërdrejt një nga arteriet kryesore që mbanin gjallë ekonominë iraniane, të rënduar prej sanksionesh.

Zëdhënësja e Ministrisë emiratase të Jashtme, Afra Al Hameli, tha se vendimi u mor "në dritën e përshkallëzimeve rajonale".

Prej vitesh, Emiratet kanë qenë një linjë shpëtimi për ekonominë iraniane, pavarësisht tensioneve politike mes dy vendeve. Sipas analistëve, nëse ky vendim mbetet në fuqi, Irani do të humbasë jo vetëm një treg të madh për mallrat e veta, por edhe një portë hyrëse drejt ekonomisë botërore.

Marrëdhënia tregtare mes dy fqinjëve është shekullore. Të ndara nga njëra-tjetra vetëm 50 milje përgjatë Gjirit Persik, Emiratet strehojnë sot qindra mijëra iranianë dhe konsiderohen nga analistët si partneri më i rëndësishëm tregtar i Teheranit në rajonin e Gjirit.

Peshën e kësaj marrëdhënieje e tregojnë shifrat. Në vitin 2024, sipas të dhënave të Organizatës Botërore të Tregtisë, Emiratet furnizuan rreth një të tretën e importeve të Teheranit, duke sjellë elektronikë të rëndësishme, metale të çmuara dhe mallra konsumi. Njëkohësisht, Emiratet janë ndër destinacionet kryesore të eksporteve iraniane, veçanërisht për produkte bazë si ushqimet dhe erëzat.

Embargoja vjen në një kontekst të nderë. Lufta që Shtetet e Bashkuara dhe Izraeli nisën në fund të shkurtit, si dhe bllokada e mëpasshme e Iranit ndaj Ngushticës së Hormuzit, kanë frenuar rritjen ekonomike në të gjitha vendet e Gjirit, duke ngulfatur eksportet energjetike nga të cilat varen këto shtete.