Eksperti amerikan kërkon seancë në Kuvend për Speciales: Pse nuk u akuzua asnjë serb?

Kërkesa është e drejtpërdrejtë: Kuvendi i Kosovës duhet të mbajë një seancë të veçantë për të shqyrtuar punën e Gjykatës Speciale. Këtë e kërkon eksperti amerikan Jason Steinbaum, i cili në një intervistë të dhënë së fundi ngriti një varg pikëpyetjesh për mënyrën se si funksionon kjo gjykatë, kush e financon dhe pse deri tani asnjë serb nuk është përballur me akuzë para saj.

"Do të doja që Kuvendi i Kosovës të organizonte një seancë për shqyrtimin e punës së gjykatës. Cilët janë këta njerëz? Përbërja? Kush e financoi, sa ishte kostoja, kush punon? Dhe më e rëndësishmja, si i interpreton kjo gjykatë ligjet që thonë apo që duket se thonë se serbët mund të ndiqen penalisht prej saj. Dhe nëse po, pse nuk ka pasur serbë të akuzuar dhe të gjykuar në këtë gjykatë, duke marrë parasysh se shumica dërrmuese e krimeve të luftës gjatë atij konflikti janë kryer nga Beogradi?", tha Steinbaum.

Pyetja për ndjekjen penale të serbëve nga Gjykata Speciale ishte shtruar edhe më herët gjatë ditës, para ish-ambasadorit amerikan Christopher Hill. Ai zgjodhi të mos hyjë në terrenin juridik.

"Jeni duke pyetur një diplomat për një pyetje ligjore dhe do t'ju kërkoja që të flisni më mirë me një jurist të çështjeve të të drejtës ndërkombëtare. Përgjigjja ime është: Nuk e di, vërtet nuk e di. Ajo çka unë di, është nevoja për avokatët e palës mbrojtëse, që të planifikojnë hapat e tyre të radhës", tha Hill.

Ai shtoi se situatës duhet t'i gjendet një zgjidhje që përputhet me faktet dhe me drejtësinë, duke shprehur hapur pakënaqësinë e tij me një vendim të gjykatës.

"Unë di po ashtu se duhet të kemi një zgjidhje të kësaj situate, të cilën do ta shikojmë si drejtësia, e cila do të jetë në përputhje me faktet.

Shpresoj se kjo të ecë përpara në mënyrë pozitive dhe ashtu si njerëz të tjerë edhe unë jam shumë i zhgënjyer me vendimin e marrë nga Gjykata Speciale vitet e fundit", deklaroi Hill.

Deklaratat e dy amerikanëve, njëra pas tjetrës brenda së njëjtës ditë, shtojnë presionin publik ndaj Gjykatës Speciale dhe e kthejnë sërish llogaridhënien e saj në temë për Kuvendin e Kosovës.