Egjipt: Dënohet me vdekje prezantuesja e njohur televizive, bashkë me 11 të akuzuar

Gruaja që fitoi njohje në Egjipt me një emision televiziv për sigurinë dhe krimin, "Mission Impossible", u dënua me vdekje pikërisht për krim të organizuar. Një gjykatë në Kajro shpalli dënimin me varje ndaj prezantueses Sarah Khalifa, 39-vjeçe, dhe 11 të akuzuarve të tjerë, në një çështje të gjerë për prodhim dhe trafikim të narkotikëve, sipas raportimeve të mediave shtetërore të publikuara të shtunën.

Sipas gazetës shtetërore Al-Ahram, gjykata e Kajros dënoi "Khalifën dhe 11 të akuzuar të tjerë me vdekje në litar për akuzat e formimit të një bande të organizuar kriminale të specializuar në sigurimin e materialeve të përdorura në prodhimin e narkotikëve, me qëllim trafikimin e tyre, si dhe për posedimin dhe mbajtjen e armëve dhe municionit pa leje".

Akuza, siç u paraqit nga gazeta shtetërore Akhbar el-Yom, ishte "prodhim i drogave sintetike me qëllim trafikimin e tyre, duke importuar nga jashtë materialet e përdorura në prodhim".

Bilanci i hetimit është i konsiderueshëm: autoritetet sekuestruan mbi 750 kilogramë narkotikë dhe lëndë të para dhe zbuluan dy banesa të përdorura si laboratorë, si dhe armë e municion pa leje.

Vendimi u shpall pasi gjykata konsultoi Myftiun e Madh të Egjiptit për mendimin e tij fetar, një procedurë e detyrueshme sipas ligjit egjiptian në rastet me dënim kapital.

Në një çështje të veçantë, që lidhet me rrëmbimin dhe sulmin ndaj një të riu, gjykata i dënoi Khalifën dhe të tjerët me nga pesë vjet burg.

Përveç karrierës televizive, Khalifa zotëron një klinikë të kirurgjisë estetike dhe një kompani producente të specializuar në organizimin e festave dhe eventeve.

Egjipti zbaton dënimin me vdekje për vrasje me paramendim, terrorizëm, disa vepra të përdhunimit dhe trafik narkotikësh. Sipas Komisionit Egjiptian për të Drejtat dhe Liritë, gjatë vitit 2025 janë shqiptuar 541 dënime me vdekje në vend.