Egjipt: 18 të vdekur në përplasjen e dy kamionçinave, shumica fëmijë punëtorë të fushës

Një përplasje e dy kamionçinave në qarkun Ismailia të Egjiptit ka lënë të paktën 18 të vdekur, shumica prej tyre fëmijë që punonin si punëtorë bujqësorë.

Aksidenti ndodhi të martën në një rrugë lidhëse në zonën Al-Dawawis të qarkut Ismailia, sipas mediumit egjiptian Al-Ahram. Njëra prej kamionçinave transportonte punëtorë të fushës kur u përplas.

Ministria e Shëndetësisë e Egjiptit bëri të ditur se numri i të prekurve arriti në 47, ndër ta rreth 30 të plagosur. Viktimat u dërguan me urgjencë në spitalin e qytetit të afërt El-Kassasin.

Rëndesën e tragjedisë e tregon mosha e viktimave. "Shumica e të vdekurve janë fëmijë 13 dhe 14 vjeç", tha për AFP-në një burim mjekësor në spital. Sipas tij, viktima më e re ishte vetëm 10 vjeç.

Punëtorët vinin kryesisht nga dy fshatra të qarkut Sharqiya dhe ishin të punësuar në një fermë në Ismailia, tha një burim i sigurisë vendore. Kamionçinat janë një mjet i zakonshëm me të cilin punëtorët e sektorit informal në Egjipt arrijnë në vendet e tyre të punës.

Presidenti Abdel Fattah el-Sisi ka urdhëruar hetim për aksidentin. Ministria e Solidaritetit Social dhe Ministria e Punës njoftuan se do të ofrojnë ndihmë financiare për familjet e të vrarëve dhe për punëtorët e plagosur.

Tragjedia rihap çështjen e punës së fëmijëve dhe të sigurisë rrugore në vend. Sipas shifrave zyrtare, të paktën 1.3 milionë të mitur janë të përfshirë në punë fëmijësh. Ndërkohë, viktimat dhe të plagosurit në aksidente rrugore janë rritur me mbi 10 për qind, sipas agjencisë shtetërore të statistikave, ku fëmijët nën 15 vjeç regjistrojnë numrin më të lartë të viktimave nga incidente të tilla.