Edhe VV troket në Kushtetuese: kush i merr kompetencat e presidentit nëse Kuvendi dështon?

Dy kërkesa brenda një dite për të njëjtën pyetje: kush i ushtron kompetencat presidenciale në Kosovë nëse Kuvendi nuk arrin ta zgjedhë sot presidentin e ri? Pas ushtrueses së detyrës së presidentes, tani edhe Lëvizja Vetëvendosje (VV) i është drejtuar Gjykatës Kushtetuese.

Kërkesën e ka nënshkruar deputeti i VV-së, Adnan Rrustemi, në emër të 31 deputetëve. Ajo nuk e trajton çështjen thjesht si paqartësi ligjore, por si konflikt kompetencash kushtetuese ndërmjet Kuvendit dhe Presidentit, dhe mbështetet në nenin 113(3)(1) të Kushtetutës.

Vetë titulli i kërkesës e përcakton qartë objektin e saj: "Kërkesë drejtuar Gjykatës Kushtetuese për zgjidhjen e konfliktit ndërmjet kompetencave kushtetuese të Kuvendit të Republikës së Kosovës dhe të Presidentit të Republikës së Kosovës, në lidhje me ushtrimin e kompetencave presidenciale të domosdoshme për vazhdimësinë institucionale dhe procesin zgjedhor pas përfundimit të periudhës gjashtëmujore të ushtrimit të detyrës së Presidentit, në mbështetje të nenit 113(3)(1) të Kushtetutës".

Hapi i deputetëve vjen pasi ushtruesja e detyrës së presidentes së Kosovës, Albulena Haxhiu, kishte kërkuar po sot nga Kushtetuesja sqarim se kush mund t'i ushtrojë kompetencat presidenciale pas përfundimit të mandatit të saj gjashtëmujor, nëse Kuvendi nuk e zgjedh presidentin e ri.

Kështu, gjykata tani ka para vetes dy kërkesa që synojnë të njëjtin boshllëk institucional, njëra nga Presidenca dhe tjetra nga një grup deputetësh të shumicës. Ende nuk dihet nëse Kuvendi do të arrijë ta zgjedhë presidentin e ri gjatë ditës së sotme.