Edhe nëse PDK-ja tërhiqet, Kushtetuesja mund ta çojë rastin deri në fund

Dorëheqja e një pale nga një kërkesë nuk e mbyll automatikisht rastin në Gjykatën Kushtetuese të Kosovës. Ky është vlerësimi i ekspertëve të fushës, në një moment kur Partia Demokratike e Kosovës ka sinjalizuar se mund t'i tërheqë dy lëndët me të cilat ka vënë në pikëpyetje vetë themelet e Kuvendit dhe të Qeverisë së re.

Hulumtuesi i Institutit Demokratik të Kosovës (KDI), Vullnet Bugaqku, ka deklaruar për KosovaPress se gjyqtarët kushtetues nuk janë të detyruar ta ndalin procedurën nëse parashtruesi heq dorë.

"Tërheqja e kërkesës nuk ndalon Gjykatën Kushtetuese që të marrë vendimin për rastin që është parashtruar tashmë. Gjykata Kushtetuese, sipas ligjit dhe Rregullores së Punës, e ka një dispozitë që thotë që, pavarësisht nëse pala tërhiqet nga parashtrimi ose pas parashtrimit të kërkesës, gjyqtarët e Gjykatës e kanë të drejtën ta vazhdojnë rastin deri në fund. Besoj se ata e kanë mundësinë që ta trajtojnë situatën e konstituimit të Kuvendit në formën që ndodhi para ca javësh", tha Bugaqku.

Kushtëzimi vjen nga vetë PDK-ja, e cila ka bërë të ditur se është e gatshme t'i tërheqë lëndët nga Kushtetuesja nëse Lëvizja Vetëvendosje zotohet publikisht se do ta mbështesë projektligjin për ndryshimin dhe plotësimin e Ligjit për Dhomat e Specializuara, pas dënimit të ish krerëve të UÇK-së.

Avokati Ardian Bajraktari e shesh çështjen përtej llogarive politike. Sipas tij, edhe në rast tërheqjeje nga iniciuesit, mbetet e domosdoshme një interpretim për pasojën juridike të tejkalimit të afatit për konstituimin e Kuvendit, si dhe për konstituimin e tij pa njërin prej nënkryetarëve.

"Çështjet janë jashtëzakonisht të rëndësishme për të ditur a kemi Kuvend të konstituar, në mungesë aktualisht të njërës prej nënkryetarëve. Mirëpo, mbi të gjitha, në radhë të parë, çështja e respektimit të afateve, siç parashihet në aktgjykimet e fundit të Gjykatës Kushtetuese, duke interpretuar nenin 66, paragrafin 1 të Kushtetutës. Prandaj vlerësoj që, megjithatë, i mbetet Gjykatës Kushtetuese të vlerësojë çështjen e interesit publik. Mendoj se këto janë me interes dhe Gjykata Kushtetuese duhet t'i sqarojë këto rrethana, në mënyrë që të ardhmen të mos vijmë në situata të ballafaqimit", tha Bajraktari.

Dy kërkesat janë dorëzuar nga PDK-ja më 14 dhe 15 shtator, duke kontestuar kushtetutshmërinë e konstituimit të Kuvendit dhe formimin e Qeverisë së re.

Ndërkohë, procedura në Kushtetuese ka ecur përpara. Nga ky institucion kanë bërë të ditur për KosovaPress se brenda afatit të përcaktuar komentet i kanë dorëzuar pesë palë: ushtruesja e detyrës së presidentes, Albulena Haxhiu, në cilësinë e kryetares së Kuvendit, Grupi Parlamentar i Lëvizjes VETËVENDOSJE!, Grupi Parlamentar i Lidhjes Demokratike të Kosovës, deputeti i Aleancës Burim Ramadani dhe Grupi Parlamentar Multietnik.