Ebola pa fre në Kivun e Veriut: vdekjet javore dyfishohen, 3.475 të vdekur në RDC

Në provincën e Kivut të Veriut, në lindje të Republikës Demokratike të Kongos, numri i vdekjeve javore nga Ebola është pothuajse dyfishuar brenda dy javësh. Alarmin e dha më 15 shtator Organizata Botërore e Shëndetësisë (OBSH), duke e përshkruar rritjen e trendeve në atë provincë si "eksponenciale".

"Tendencat në nivel kombëtar nuk reflektojnë tendencat në nivel provincial ose në nivel lokal", theksoi në një konferencë shtypi në Gjenevë Olivier le Polain, shef i njësisë së epidemiologjisë dhe analizës për ndërhyrjet në OBSH. "Kemi tendenca që rriten në mënyrë të ndjeshme, eksponenciale në nivel të Kivut të Veriut", shtoi ai.

Sipas le Polain, në këtë provincë "numri i vdekjeve javore është pothuajse dyfishuar gjatë dy javëve të fundit, duke kaluar nga rreth 100 raste të reja në javë në më shumë se 200". Javën e kaluar, Kivu i Veriut grumbulloi rreth 45 për qind të totalit të rasteve të raportuara në të gjithë vendin. "Në përgjithësi, transmetimi i virusit (...) mbetet intensiv dhe i shtrirë gjeografikisht", thotë zyrtari i OBSH-së, i cili bëri të ditur se më 12 shtator "vendi ka raportuar 7.200 raste dhe 3.475 vdekje të shpërndara (...) tashmë në shtatë provinca".

Vlerësimi i OBSH-së bie në kontrast me atë të autoriteteve kongoleze. Të shtunën, qeveria e Kongos njoftoi se kulmi i epidemisë ishte arritur në mesin e gushtit dhe se "parametrat tregonin një ulje të numrit të rasteve" në nivel kombëtar. OBSH-ja, nga ana e saj, insiston se situata epidemiologjike mbetet heterogjene.

Tabloja ndryshon nga provinca në provincë. Në zona të caktuara të Iturit, ku epidemia u shpall në mesin e majit, le Polain raportoi "disa shenja të hershme të reduktimit të transmetimit", me "proporcionin e rasteve që zvogëlohet me kalimin e kohës". Në Kivun e Jugor nuk është zbuluar asnjë rast i konfirmuar nga fundi i majit. Një rast i kohëve të fundit është sinjalizuar në Ubangin e Jugor dhe tre raste në Uelen e Poshtëm. Tshopo raporton raste "sporadike, kryesisht të importuara", ndërsa Uele i Sipërm shfaq një transmetim lokal "më të konsoliduar", me rreth 30 deri në 40 raste të reja në javë.

Përkundër përmirësimeve të pjesshme, zyrtari i OBSH-së nuk fshehu shqetësimin: "Këta indikatorë nuk tregojnë ende nivelin e përmirësimit që do të dëshironim të konstatonim". Rreziku kryesor, sipas tij, mbetet përhapja në territore të reja, pasi "rasti i ri i zbuluar javën e kaluar në provincën e Ubangit të Jugor kujton rrezikun e një shtrirjeje gjeografike të epidemisë, në një kontekst të lëvizshmërisë shumë të lartë të popullsisë".

Shkalla e shpërndarjes e detyron OBSH-në të ndryshojë edhe gjuhën me të cilën e përshkruan krizën: "Epidemia është aq e gjerë që është e vështirë të flitet për një epidemi të vetme: bëhet fjalë më shumë për vatra të shumta dhe të veçanta, dhe do të duhet të zhvillojmë një përgjigje të përshtatur në secilën prej këtyre".