Ebola kapërcen kufijtë: shpërthimi nga Kongo arrin në Nigeri, Kenia dhe Francë

Nigeria u bë të martën vendi më i ri i prekur nga shpërthimi i Ebolës që u shpall për herë të parë në lindje të Kongos në mesin e majit. Sëmundja ka kaluar tashmë në katër vende të tjera, në dy prej të cilave është ende aktive, dhe ka mbërritur në tri rajone të Afrikës: qendror, perëndimor dhe lindor. Asnjë shpërthim i mëparshëm i Ebolës nuk ishte shtrirë kaq larg në kontinent.

Shifrat në Kongo janë rënduese: nga 9.500 persona të infektuar, të paktën 4.600 kanë vdekur. Shpërthimi shkaktohet nga virusi i rrallë Bundibugyo, për të cilin nuk ekziston asnjë vaksinë apo ilaç i miratuar. Organizata Botërore e Shëndetësisë (OBSH) e ka cilësuar atë si shpërthimin e Ebolës me rritjen më të shpejtë në histori.

Rasti nigerian u konfirmua në kryeqytetin Abuja. Bëhet fjalë për një grua që kishte ardhur nga Uganda rreth dy javë më parë, edhe pse data e saktë e mbërritjes së saj në Nigeri ende nuk dihet. Simptomat i shfaqi më 7 tetor, më 11 tetor u shtrua në një spital privat në Abuja dhe aty, më vonë, iu diagnostikua Ebola. Ministri nigerian i Shëndetësisë, Muhammad Pate, tha se autoritetet kanë nisur gjurmimin e 44 personave të identifikuar si kontakte të pacientes dhe po bëjnë "gjithçka të mundshme për ta kufizuar këtë rast".

Më e rëndë është situata në Kenia. Rasti i parë u shpall më 6 tetor: një burrë që kishte udhëtuar nga Kongo përmes Ugandës dhe kishte mbërritur në Nairobi më 3 tetor. Ai rezultoi pozitiv më 5 tetor dhe vdiq po atë ditë. Që atëherë, numri i rasteve në vend është rritur në nëntë, mes tyre katër të afërm të pacientit të parë dhe katër punonjës shëndetësorë. Autoritetet keniane kanë identifikuar 135 kontakte të lidhura me nëntë të sëmurët, nga të cilat 134 janë në karantinë. Ministria e Shëndetësisë e Kenias deklaroi se ende nuk ka prova për përhapje përtej kontakteve të njohura të pacientit të parë.

Uganda ishte vendi i parë që u përball me valën. Ajo konfirmoi shpërthimin në të njëjtën ditë me Kongon fqinje, pasi zbuloi infeksionin te një burrë që udhëtonte nga Kongo. Sipas autoriteteve shëndetësore, rastet e para në Ugandë ishin pacientë kongolezë që kishin kaluar kufirin për t'u kuruar nga një sëmundje e panjohur, para se të merrej vesh se kishin Ebolë. OBSH-ja e shpalli të mbyllur shpërthimin në Ugandë më 27 gusht, pas 20 rasteve të konfirmuara, nga të cilat 15 ishin pacientë nga Kongo. Tetëmbëdhjetë persona u shëruan dhe dy vdiqën. Mbi 800 kontakte u identifikuan dhe u monitoruan, ndërsa të martën vendi raportoi se nuk ka raste të reja.

Jashtë Afrikës, i vetmi vend që ka regjistruar një rast në këtë shpërthim është Francia. Në qershor, autoritetet franceze konfirmuan infeksionin te një mjek që po kthehej nga Kongo, pas një misioni humanitar në një zonë ku virusi përhapej. Sipas OBSH-së, ai u trajtua në një strukturë të specializuar në Francë, u shërua dhe doli nga spitali më 4 korrik.