Ebola kalon 7.000 raste në Kongo, virusi zbulohet edhe në shkollat e Iturit

Në Bunia, kryeqytetin e provincës veriore të Iturit, prindërit i dërgojnë fëmijët në shkollë me frikën se çfarë mund të sjellin klasat e mbushura. Pak ditë pas kthimit nga pushimet verore, Ebola u zbulua në shkollat e provincës, duke alarmuar prindërit dhe punonjësit shëndetësorë.

"Jemi shumë të shqetësuar sepse nuk e dimë se cili fëmijë vjen nga cila familje ose cila është gjendja shëndetësore e anëtarëve të asaj familjeje", tha për agjencinë AFP Angele Magani, nëna e një nxënësi në Bunia. "Kemi shumë frikë, edhe pse autoritetet shkollore na qetësojnë për masat shëndetësore që janë vendosur", shtoi ajo.

Sipas autoriteteve kongoleze, epidemia aktuale ka kaluar pragun e 7.000 rasteve dhe është shpërthimi më i rëndë i Ebolës ndonjëherë në Republikën Demokratike të Kongo. Nga 7.022 raste të regjistruara, 3.398 persona kanë humbur jetën. Aktualisht 837 persona ndodhen në izolim ose po marrin trajtim.

Bëhet fjalë për virusin e rrallë Bundibugyo, epidemia e 17-të e Ebolës në këtë vend. Ajo nisi në provincën verilindore të Iturit dhe u zbulua zyrtarisht nga autoritetet në mesin e majit, megjithëse ekspertët dyshojnë se virusi kishte qarkulluar i pavërejtur për javë të tëra më parë.

Që atëherë, epidemia është përhapur në rajone të largëta lindore dhe veriore, të goditura nga konflikti, ku grupe të armatosura veprojnë prej dekadash, prania e shtetit është e dobët dhe infrastruktura shëndetësore kryesisht mungon. Këtë javë u konfirmua një rast në provincën e shtatë, Ubangi-Jug, në veriperëndim të vendit, në kufi me Republikën e Afrikës Qendrore dhe Kongo-Brazavilën. Shumica e rasteve të regjistruara mbeten megjithatë në Ituri.

Në shkollat e Bunias janë vendosur masa elementare mbrojtëse. "Ekziston një sistem i detyrueshëm i larjes së duarve me sapun dhe kemi bërë gjithashtu çdo gjë të mundur për të pasur maksimumi 30 nxënës për klasë", tha zyrtari shkollor i Bunias, Roger Mungimbo, për AFP-në. "Ne rregullisht i ndërgjegjësojmë fëmijët se nuk duhet të prekin njëri-tjetrin, nuk duhet të përshëndeten dhe duhet të lajnë duart rregullisht", shtoi ai.

Ebola transmetohet përmes kontaktit me lëngjet trupore dhe mund të shkaktojë gjakderdhje të rënda të brendshme dhe të jashtme, si dhe dështim të organeve. Në pesëdhjetë vjetët e fundit, sëmundja ka vrarë mbi 15.000 njerëz në Afrikë. Epidemia më vdekjeprurëse në botë, ajo e Afrikës Perëndimore në vitet 2014-2016, u shkaktua nga virusi Ebola Zaire dhe mori jetën e mbi 11.325 personave, kryesisht në Guine, Liberi dhe Sierra Leone.

Vështirësia shtesë e kësaj epidemie qëndron te vetë virusi: për shtamin Bundibugyo që po qarkullon në Kongo nuk ka aktualisht asnjë vaksinë apo trajtim të miratuar, ndonëse disa terapi dhe vaksina potenciale janë në fazë testimi.