Dyer të mbyllura: Specialja rrëzoi një nga një ankesat e Thaçit, Veselit e Krasniqit

Për më shumë se tre vjet, ekipet mbrojtëse të Hashim Thaçit, Kadri Veselit dhe Jakup Krasniqit trokitën te çdo derë që u ofronte sistemi i Dhomave të Specializuara të Kosovës. Asnjëra nuk u hap. Dokumentet e publikuara në faqen zyrtare të institucionit tregojnë se kërkesat e tyre u refuzuan nga Gjykata Supreme, ndërsa referimet në Dhomën e Specializuar të Gjykatës Kushtetuese u shpallën të papranueshme.

Veseli ishte ndër të parët që provoi rrugën e Supremes. Më 29 qershor 2022, mbrojtja e tij paraqiti kërkesë për mbrojtjen e ligjshmërisë, duke kundërshtuar vazhdimin e paraburgimit. Përgjigjja erdhi më 15 gusht të po atij viti: Gjykata Supreme e hodhi poshtë kërkesën në tërësi, me arsyetimin se nuk kishte shkelje thelbësore procedurale, dhe disa nga argumentet i cilësoi të papranueshme.

Tre vjet më vonë, në nëntor 2025, Veseli u rikthye me një kërkesë të re, këtë herë kundër refuzimit të lirimit të tij të përkohshëm. Edhe ajo u rrëzua, më 19 dhjetor 2025.

Po në nëntor 2025, edhe Krasniqi kërkoi mbrojtjen e ligjshmërisë. Kërkesa e tij u hodh poshtë më 30 dhjetor. Sipas Speciales, disa nga bazat e ngritura nga mbrojtja ishin të papranueshme ose dilnin jashtë kompetencave të Gjykatës Supreme.

Fronti kushtetues nuk dha rezultat më të mirë. Më 28 shkurt 2022, Veseli dhe Krasniqi iu drejtuan Dhomës së Specializuar të Gjykatës Kushtetuese, duke pretenduar se u ishin shkelur të drejtat themelore gjatë procedurave penale. Më 13 qershor 2022, referimet e tyre u shpallën të papranueshme, pasi gjykata konstatoi se nuk kishte shfaqje të shkeljes së të drejtave kushtetuese.

Thaçi ndoqi të njëjtën rrugë dy herë. Referimi i tij i parë, i paraqitur në shkurt 2022, u shpall i papranueshëm në qershor të atij viti. I dyti, i paraqitur në gusht 2024 dhe i lidhur me masat e posaçme hetimore gjatë paraburgimit, pati të njëjtin fat në nëntor 2024.

Këto vendime procedurale i paraprinë aktgjykimit të shkallës së parë ndaj katër të akuzuarve: Thaçit, Veselit, Selimit dhe Krasniqit. Sipas aktgjykimit të publikuar nga vetë Specialja, Thaçi dhe Krasniqi u dënuan me nga 25 vjet burgim, Veseli me 18 vjet, ndërsa Selimi me 13 vjet. Trupi Gjykues i shpalli fajtorë për disa krime lufte, por të pafajshëm për akuzat për krime kundër njerëzimit.

Pikërisht seria e kërkesave të mbyllura me vendime papranueshmërie ka ushqyer kritikat e mbështetësve të të akuzuarve ndaj gjykatës.

Aktgjykimi nuk është fjala e fundit. Si vendim i shkallës së parë, ai mund t'u nënshtrohet procedurave të mëtejshme sipas rregullave të Dhomave të Specializuara, çka do të thotë se çështja nuk mund të konsiderohet ende e mbyllur.