Dy zjarre, një grua 86-vjeçare në flakë: dy kosovarë në paraburgim në Gjermani

Një shpërthim i fortë në një apartament në Böblingen dhe, më pak se pesë muaj më vonë, një shtëpi e përfshirë nga flakët ndërsa brenda flinte një grua 86-vjeçare. Sipas hetuesve gjermanë, të dyja ngjarjet çojnë te dy shtetas të Kosovës, 58 dhe 37 vjeç, që tani ndodhen në paraburgim.

Policia e Ludwigsburgut dhe Prokuroria e Stuttgartit i kanë lidhur dy burrat me dy zjarrvënie të rënda në ndërtesa banimi. Në rastin e dytë, autoritetet po hetojnë edhe dyshimin për tentativë vrasjeje.

Ngjarja e parë u regjistrua më 11 nëntor 2025, rreth orës 19:15, në Brunnenstraße të Böblingenit. Sipas hetuesve, një banor i një ndërtese shumëfamiljare dëgjoi një shpërthim të fortë dhe pak më pas pa se apartamenti në katin përdhes ishte në flakë. Zjarri arriti deri në ballkon, ndërsa nxehtësia theu xhamat e dritareve. Për arsye sigurie u evakuuan rreth 28 persona nga ndërtesa dhe nga dy objekte fqinje. Askush nuk u lëndua, ndërsa dëmi material u vlerësua fillimisht në rreth 50 mijë euro.

Hetimi i mëtejshëm i përqendroi dyshimet te 58-vjeçari. Sipas policisë, gjurmët çuan më pas edhe te 37-vjeçari, po ashtu shtetas i Kosovës. Autoritetet dyshojnë se 58-vjeçari mund ta ketë angazhuar bashkatdhetarin e tij për t'i vënë flakën një shtëpie në Jägerholzweg, në Weil im Schönbuch-Breitenstein.

Ky zjarr i dytë shpërtheu më 29 mars 2026. Rreth orës 21:00, gruaja 86-vjeçare që ndodhej brenda u zgjua nga alarmi i detektorit të tymit dhe arriti të dilte nga shtëpia bashkë me qenin e saj. Të dy shpëtuan pa lëndime. Zjarrfikësit punuan rreth tre orë për ta vënë zjarrin nën kontroll. Shtëpia mbeti e pabanueshme dhe dëmi u vlerësua në rreth 200 mijë euro. Pikërisht prania e një personi brenda banesës, si dhe rrethanat e rastit, i kanë shtyrë autoritetet ta hetojnë këtë ngjarje edhe si tentativë vrasjeje.

Arrestimet erdhën në fillim të shtatorit, pas hetimeve të përbashkëta të policive kriminale të Ludwigsburgut dhe Kielit. Më 3 dhe 4 shtator, të dy u paraqitën para gjyqtarit në Gjykatën e Qarkut të Stuttgartit, me kërkesë të Prokurorisë së Stuttgartit. Gjykata lëshoi urdhër-arreste për të dy dhe vendosi t'i mbajë në paraburgim, nën dyshimin për zjarrvënie të rëndë dhe, për rastin e dytë, edhe për tentativë vrasjeje.

Hetuesit po përpiqen tani të përcaktojnë rolin konkret të secilit prej të dyshuarve, ndërsa motivi i mundshëm pas dy zjarreve nuk është bërë ende i ditur. Të dy burrat konsiderohen të pafajshëm derisa fajësia e tyre të vërtetohet me një vendim përfundimtar gjyqësor.