Dy vrasje në të njëjtën datë, në të njëjtin burg: Kurti përkujton Greiçevcin dhe Dugollin

E njëjta datë, i njëjti burg, i njëjti pushtet — por dy epoka të ndara nga 34 vjet. Kryeministri në detyrë i Kosovës, Albin Kurti, ka përkujtuar Fazli Greiçevcin dhe Cen Dugollin, dy figura që vdiqën më 17 gusht në burgun e Prishtinës: i pari më 1964, i dyti tri dekada e katër vjet më vonë, më 1998.

"Të dy ata janë vrarë në të njëjtën datë, në të njëjtin vend dhe nga i njëjti pushtet, por në dy mote të ndryshme me 34 vite mes tyre. Sot, në përvjetorët e tyre, i kujtojmë Fazli Greiçevcin dhe Cen Dugollin", shkroi Kurti.

Fazli Greiçevci, i lindur më 1935 në Sankoc të Drenasit, ishte mësues, poet dhe aktivist politik i organizatës Lëvizja Revolucionare për Bashkimin e Shqiptarëve. Në Shkollën Normale në Prishtinë ishte shok klase me Rexhep Qosjen dhe shok idealesh me Adem Demaçin. Në fillim të viteve '60 punoi si mësues në disa fshatra të Drenicës, ndërsa shkruante poezi, disa prej të cilave i botoi në revistat "Jeta e Re" dhe "Zani i Rinisë".

Në fund të verës së vitit 1963, një grup aktivistësh të rinj formuan në Prishtinë organizatën e fshehtë politike Lëvizja Revolucionare për Bashkimin e Shqiptarëve, të drejtuar nga Adem Demaçi. Mes aktivistëve drejtues ishte edhe Greiçevci. Në qershor 1964, autoritetet jugosllave të sigurisë arrestuan mbi 300 pjesëtarë të organizatës. Greiçevci nuk ishte mes të arrestuarve, por u dorëzua në polici. Nga 3 gushti 1964 ai u torturua për dy javë në burgun e Prishtinës, derisa vdiq më 17 gusht 1964.

Cen Dugolli, i lindur më 25 shtator 1966, u angazhua gjatë viteve '90 në degën e Ferizajt të Këshillit për Mbrojtjen e të Drejtave dhe Lirive të Njeriut, në shoqatën humanitare "Nënë Tereza" dhe në Unionin e Pavarur të Studentëve në Shkollën e Lartë Teknike në Ferizaj. Më pas u mobilizua si ushtar në Ushtrinë Çlirimtare të Kosovës, në Zonën Operative të Nerodimës.

Më 21 qershor 1998, Dugolli u arrestua nga policia serbe në shtëpinë e tij në Ferizaj dhe u rrah në prani të familjes. Fillimisht u mbajt në burgun e Gjilanit, e më pas u transferua në burgun e Prishtinës, ku sipas rrëfimit u torturua nga autoritetet e sigurisë dhe gjyqësisë serbe. Si pasojë e torturave, ra në koma më 16 gusht dhe, i dërguar në spitalin e Prishtinës, vdiq më 17 gusht 1998.

Përkujtimin, Kurti e mbylli me një mesazh: "Lavdi Fazli Greiçevcit e Cen Dugollit, dhe gjithë atyre jetëve që u shuan nga dhuna e regjimit serb në rrugën e angazhimit të tyre për lirinë e Kosovës!"