Dy vende bosh në Kushtetuese: hapet gara, afati deri më 2 nëntor 2026

Gjykata Kushtetuese e Kosovës ka dy vende bosh, të trashëguara nga legjislatura paraprake, dhe gara për t'i plotësuar ato nis që nesër. Komisioni i Posaçëm për Shqyrtimin e Kandidatëve për Emërim në Gjykatën Kushtetuese vendosi në mbledhjen e tij të parë të shpallë thirrjen publike për zgjedhjen e dy gjyqtarëve të rinj.

Kryetari i komisionit, Vigan Qorrolli, njoftoi se thirrja do të qëndrojë e hapur për 20 ditë, deri më 2 nëntor 2026. Qorrolli e lidhi vendimin drejtpërdrejt me vakancat e mbetura: "Meqenëse nga legjislatura paraprake janë dy vakanca në Gjykatën Kushtetuese dhe janë dy sosh, siç përcjell atyre, ashtu sot komisioni i posaçëm për shqyrtimin e kandidatëve për anëtarë në Gjykatën Kushtetuese e ka bërë mbledhjen e parë dhe ka vendosur që ta shpallë thirrjen publike, nga dita e nesërme që do të zgjasë 20 ditë deri më 2 nëntor të vitit 2026".

Dera është e hapur nga dy anë. Sipas Qorrollit, në përputhje me ligjin për Gjykatën Kushtetuese, institucionet e drejtësisë mund të nominojnë kandidatë që plotësojnë kushtet ligjore, "por ashtu edhe individët mund të vetëpropozohen".

Pasi të mbyllet afati i aplikimit, komisioni do të shqyrtojë kandidaturat e pranuara dhe do të zhvillojë intervista me kandidatët. Ata që vlerësohen të emërueshëm do t'i propozohen Kuvendit, i cili ka fjalën e fundit përmes votimit në seancë plenare.