Dy turistë çekë të bllokuar në Kanionet e Gradecit, dronët i gjejnë mes terrenit të thyer

Kur familjarët nuk arritën më t'i kontaktonin, alarmi shkoi te policia. Dy turistë çekë, njëri 43 dhe tjetri 76 vjeç, kishin mbetur të bllokuar në Kanionet e Gradecit, në një zonë me terren të vështirë malor, pa mundësi për të vazhduar lëvizjen.

Operacioni i kërkim-shpëtimit nisi menjëherë sapo policia mori njoftimin për humbjen e kontakteve. Shërbimet e Komisariatit të Policisë Skrapar u koordinuan me Forcën Kombëtare të Sigurisë, Njësinë Alpine Fier dhe Ekipin Canyoning Skrapar për të lokalizuar dy personat në zonën e vështirë.

Gjatë kontrollit, efektivët përdorën edhe dronë. Ishte pikërisht kjo pamje nga ajri që bëri të mundur gjetjen e dy turistëve, të cilët për shkak të terrenit të thyer nuk mund të lëviznin më. Falë ndërhyrjes së koordinuar, të dy u nxorën në mënyrë të sigurt nga kanionet dhe u transportuan jashtë zonës së rrezikshme.

Pas shpëtimit, dy turistët falënderuan efektivët e policisë dhe ekipet e tjera të përfshira, duke vlerësuar reagimin e shpejtë dhe përkushtimin e treguar. Policia e Shtetit bëri të ditur se mbetet e angazhuar për garantimin e sigurisë së qytetarëve dhe turistëve, duke reaguar në çdo situatë emergjente në territor.