Zubin Potok: identifikimi i 23 trupave ecën ngadalë, nëntë të dyshuar drejt paraburgimit

Dy familje nga Klina dhe Istogu pritet të marrin javën që vjen lajmin që e kanë pritur prej muajsh: mbetjet mortore të të afërmve të tyre janë identifikuar. Këtë e bëri të ditur Agron Limani, kryesuesi i Komisionit Qeveritar për të Zhdukurit, duke sqaruar se të dy personat nuk janë pjesë e “Grupit të Intelektualëve”, rasti që ka rikthyer vëmendjen te Zubin Potoku.

“Javën e kaluar kemi pranuar dy raporte për dy identifikime të reja, por nuk i përkasin grupit të 23 intelektualëve”, tha Limani në KTV. Sipas tij, familjarët nuk janë njoftuar ende, “sepse është edhe një procedurë”.

“Njëri është në Klinë, njëri në Istog. Është pritur goxha për identifikimin e tyre, prej muajsh është pritur për këto raporte. Besoj javën që vjen do të informohen familjet për këto verifikime”, shtoi ai.

Për veriun, Limani nuk dha shpresa të reja për momentin. “Nuk kemi informacion për zonën e veriut se a do të bëhen gërmime të tjera”, deklaroi ai.

Gërmimet në Zubin Potok nisën më 28 korrik 2026 dhe zgjatën katër javë. Gjatë muajit gusht, autoritetet kosovare gjetën në fshatrat Kalludër dhe Jabukë mbetje mortore që dyshohet se u përkasin të paktën 23 personave. Deri tani, tri prej tyre janë identifikuar si pjesë e 23 personave të “Grupit të Intelektualëve”. Për pjesën tjetër, sipas Limanit, do të duhet kohë.

Identifikimin e tri viktimave të para e kishte njoftuar më 20 shtator 2026 kryeministri i Kosovës, Albin Kurti. Ai tha se viktimat u identifikuan përmes raporteve të ADN-së, se personat përgjegjës i kishin njoftuar tashmë familjet dhe se në ditët në vijim priteshin raporte të tjera për viktimat e tjera nga varrezat në Zubin Potok.

Ndërkohë, rasti ka marrë edhe dimension penal. Tre persona ishin nën hetim për krime lufte kundër popullsisë civile dhe ndodhen në paraburgim. Më 27 shtator 2026, Prokuroria Speciale e Republikës së Kosovës njoftoi se kishte arrestuar nëntë persona në Zubin Potok si të dyshuar për krime lufte në rastin “Grupi i Intelektualëve”.

Një ditë më vonë, më 28 shtator, prokuroria bëri të ditur në Facebook se i kishte kërkuar Gjykatës Themelore në Prishtinë, Departamentit Special, caktimin e masës së paraburgimit për nëntë të arrestuarit. Sipas dyshimeve të prokurorisë, personat me inicialet D.D., M.R., M.R., R.R., S.D., S.D., V.L., R.R. dhe D.D. dyshohen për pjesëmarrje në vrasjen dhe zhdukjen e 23 civilëve në Zubin Potok. Gjykata ende nuk ka vendosur për kërkesën, ndërsa të dyshuarit gëzojnë prezumimin e pafajësisë.