Dy të maskuar hyjnë nga ballkoni në një banesë në Prishtinë dhe marrin armën me leje

Dy persona të maskuar, të veshur me të zeza, janë parë duke u larguar nga ballkoni i një banese në Prishtinë. Sipas Policisë së Kosovës, ata kishin hyrë me forcë brenda dhe kishin marrë armën e pronarit, për të cilën ai ka leje.

Rasti është raportuar më 3 tetor, rreth orës 21:50. Hajdutët kishin dëmtuar derën e ballkonit për të hyrë në banesë. Në raportin 24-orësh të policisë thuhet: "Ankuesi m/k ka raportuar se persona të panjohur kishin dëmtuar derën e ballkonit dhe kishin hyrë me forcë në banesën e tij ku nga aty kanë arritur të marrin armën e tij për të cilën posedon leje".

Pronari i ka treguar policisë se i kishte vërejtur të dy personat në momentin kur po largoheshin nga ballkoni, në drejtim të panjohur. Autorët ende nuk janë identifikuar.