Dy kosovarë të arrestuar në protestën e Tiranës: në polici thanë se janë simpatizantë të Kurtit

Dy protestues të ardhur nga Kosova janë arrestuar në Tiranë pas akteve të dhunshme gjatë protestës në kryeqytetin shqiptar. Para policisë, të dy kanë deklaruar se janë simpatizantë të kryeministrit Albin Kurti.

Sipas deklarimeve të tyre në komisariat, të raportuara nga televizioni Klan Shqipëria, ata kishin udhëtuar nga Prishtina drejt Tiranës me një autobus, posaçërisht për të marrë pjesë në protestë. Në të njëjtin autobus, sipas tyre, ndodheshin edhe simpatizantë të tjerë të Kurtit.

Qëllimi i udhëtimit, të paktën sipas fjalëve të tyre, ishte politik dhe i shprehur hapur: "Jemi simpatizantë të Kurtit. Erdhëm nga Prishtina për të rrëzuar qeverinë shqiptare. Duam një qeveri pro politikave të Vetëvendosjes. Bashkë me ne në autobus ishin edhe simpatizantë të tjerë të Albin Kurtit".

Identiteti i të arrestuarve, akuzat formale ndaj tyre dhe natyra e akteve të dhunshme për të cilat u ndaluan nuk janë bërë ende të ditura.