Dy goditje me dron në dhjetë minuta: 80 të vrarë pranë një tregu në Sudan

Dita e tregut sapo kishte mbaruar në al-Dibab dhe njerëzit ishin mbledhur te pika e transportit, në pritje të një mjeti për t'u kthyer në shtëpi. Të dielën në mbrëmje, një dron goditi pikërisht aty, dy herë, me dhjetë minuta diferencë. Bilanci i fundit është 80 të vrarë, shumica udhëtarë që kishin dalë nga tregu i këtij qyteti në shtetin e Kordofanit Perëndimor, në jug të Sudanit.

Ahmed Wadi, një dëshmitar i sulmit, tha se ndihmoi me duart e tij të varroseshin 50 trupa, mes tyre edhe vëllai i tij. Duke përdorur një lidhje interneti satelitore për të anashkaluar ndërprerjen e komunikimeve në zonë, ai rrëfeu se droni ra "mbi një nyje transporti ku njerëzit mblidhen për t'u kthyer në fshatrat e tyre pasi mbaron dita e tregut".

Sipas Wadit, 47 persona të tjerë u dërguan në qytetin më të afërt, al-Mujlad. Një burim mjekësor, i cili kërkoi të mos identifikohej për shkak të sigurisë së tij, tha se 30 prej tyre ndërruan jetë nga plagët. "Gjithsej 80 persona u vranë në sulmin me dron në al-Dibab, ndërsa një tjetër sulm me dron në al-Mujlad plagosi katër persona, të cilët aktualisht po trajtohen", deklaroi mjeku.

Administrata e shpallur nga Forcat e Mbështetjes së Shpejtë (RSF), e njohur si Tasis, akuzoi ushtrinë se qëndron pas sulmit të së dielës. I gjithë shteti i Kordofanit Perëndimor ndodhet nën kontrollin e RSF-së.

Goditja renditet ndër më vdekjeprurëset që nga prilli i vitit 2023, kur lufta për pushtet mes Forcave të Armatosura Sudaneze (SAF), të udhëhequra nga gjenerali Abdel Fattah al-Burhan, dhe forcave paraushtarake RSF, të drejtuara nga Mohamed Hamdan Dagalo, shpërtheu në dhunë në kryeqytetin Khartum.

Dronët janë kthyer në armën më vdekjeprurëse për civilët në këtë luftë. Mes janarit dhe prillit, sulmet me dron shkaktuan të paktën 880 viktima civile, më shumë se 80 për qind e të gjithë civilëve të vrarë në konflikt në Sudan.

Vetëm dy ditë para sulmit në al-Dibab, të premten, dronët goditën një treg të mbushur me bagëti në Nyala, kryeqytetin e shtetit të Darfurit Jugor. SAF deklaroi se kishte vrarë luftëtarë të RSF-së, ndërsa RSF e akuzoi ushtrinë se kishte vrarë 30 civilë.

Lufta në Sudan ka marrë jetën e qindra mijëra njerëzve dhe ka zhvendosur shumë më tepër. Ajo ushqehet edhe nga fuqi të huaja me interesa të drejtpërdrejta, të cilat mbështetin palët në konflikt.

Javën e kaluar, Rosemary DiCarlo, nënsekretare e përgjithshme e OKB-së për çështjet politike dhe ndërtimin e paqes, paralajmëroi Këshillin e Sigurimit se konflikti dhe kriza humanitare po përkeqësohen "pa asnjë përparim në horizont". "Ato [palët ndërluftuese] nuk po i afrohen dialogut. Përkundrazi, duket se besojnë se mund të arrijnë fitime më të mëdha në fushëbetejë dhe se mbështetja e vazhdueshme e jashtme do t'u lejojë të ndjekin objektivat e tyre me forcë", tha ajo.