Dy burra pa dokumente, të fshehur në rimorkio kamioni në kufirin e Hanit të Elezit

Dy burra pa asnjë dokument identifikimi u gjetën të fshehur në rimorkion e një kamioni në pikën kufitare në Han të Elezit. Policia e Kosovës e ka nisur rastin si "kontrabandim me migrantë".

Sipas raportit të policisë, kamioni kishte hyrë në Kosovë nga Maqedonia e Veriut përmes kësaj pike kufitare. Drejtuesi i tij trajtohet si i dyshuar. Pas hyrjes, mjeti u vendos në terminalin doganor për procedura të mëtejshme, dhe pikërisht aty, gjatë kontrollit të rimorkios, policët zbuluan dy personat e fshehur.

Të dy burrat deklaruan se janë shtetas të huaj, ndërsa kombësia e tyre nuk është bërë publike.

Me urdhër të prokurorit, palët u intervistuan dhe më pas u liruan në procedurë të rregullt.